ПРАГА, 20 июль. /“Дунё” АА/. Ўзбекистоннинг Чехиядаги элчихонаси дипломатлари мураккаб ҳаётий вазиятга тушиб қолган ватандошимизга юртига қайтишда кўмаклашди, деб хабар бермоқда “Дунё” АА мухбири.

Фуқаро М.Х. 2025 йилда Чехияга келган, сўнгра меҳнат фаолияти билан боғлиқ ҳолда Польшанинг Вроцлав шаҳрида вақтинча истиқомат қилган. 2026 йилнинг февраль ойида Прага шаҳрида бўлиб турган вақтида унинг хорижга чиқиш паспорти ўғирлаб кетилган. Шундан сўнг у шахсини тасдиқловчи ҳужжатларсиз қолиб, ҳуқуқий мақомини тиклаш ва Ўзбекистонга қайтишда қийинчиликларга дуч келган.

Фуқаронинг мурожаатидан сўнг элчихона томонидан зудлик билан зарур консуллик-ҳуқуқий ёрдами кўрсатилди. Кўрилган чора-тадбирлар натижасида унинг депортация қилиниш хавфи олди олинди ҳамда Ўзбекистонга қайтиш гувоҳномаси расмийлаштириб берилди.

Бундан ташқари, Чехия Ички ишлар вазирлиги билан ҳамкорликда фуқаронинг юртига қайтиши учун авиачипта харажатларининг бир қисми Чехия томонидан қопланди. Шундан сўнг ҳамюртимиз соғ-саломат ватанига қайтиб келди.

Ўзбекистоннинг хориждаги элчихоналари мураккаб шароитларда қолган фуқароларга кўмак бериш ҳамда уларнинг чет эллардаги ҳуқуқ ва манфаатларини ҳимоя қилиш бўйича ишларни изчил давом эттирмоқда.