САНКТ-ПЕТЕРБУРГ, 27 июнь. /“Дунё” АА/. Бош консулхона Фарғонанинг “Нефтчи” ҳамда Санкт-Петербургнинг “Зенит” жамоалари ўртасида бўлиб ўтадиган ўртоқлик учрашуви учун ўзбекистонлик футболчиларни қўллаб-қувватлаш мақсадида фан-зона ташкил этмоқда, деб хабар бермоқда “Дунё” АА мухбири.

Ушбу учрашув шу йил 8 июль куни Москва вақти билан соат 19:00 да бошланади. Айни пайтда мазкур беллашувга пухта тайёргарлик кўрилмоқда.

1925 йилда асос солинган “Зенит” жамоаси амалдаги чемпион ва Россия Премьер-лигасининг етакчиси ҳисобланади. Клуб активида 10 та чемпионлик, 5 та Россия кубоги ҳамда 2008 йилда қўлга киритилган UEFA Кубоги ва Суперкубоги мавжуд.

Ўйинларга мухлислик статистикаси клубнинг юқори тижорий жозибадорлигини тасдиқлайди: сиғими 67 800 томошабинга мўлжалланган “Газпром Арена” стадионидаги уй учрашувлари ҳар бир ўйинга 30 мингдан ортиқ мухлисни жалб этиб, Россия Премер лигаси учун рекорд даражадаги ўртача ташрифни барқарор таъминлаб келмоқда. Клубнинг рақамли медиа аудиторияси 4,5 миллион обуначидан ошади, таркибнинг трансфер қиймати эса 160 миллион евродан юқори баҳоланади.

“Зенит”–“Нефтчи” учрашувига ватандошларнинг кўп сонли ташрифини таъминлаш мақсадида Бош консулхона ўзининг расмий telegram-каналида ўзбек ва рус тилларида эълон-анонс жойлаштирди. Бундан ташқари, ахборот қамровини кенгайтириш учун ушбу анонс блогерлар ва янгиликлар каналларига ҳам тарқатилди.

Фарғона клуби мухлисларининг “Газпром Арена”нинг 111 ва 112-секторларида жойлаштириш режалаштирилмоқда. Мухлисларнинг бир секторда тўпланиши Санкт-Петербургда истиқомат қилаётган ватандошлар ўртасидаги ҳамжиҳатликни мустаҳкамлашга хизмат қилади.

Айни пайтда мухлисларнинг стадион умумий фонида ажралиб туриши учун “Нефтчи” клуби атрибутикаси (футболкалар, кепкалар, шарфлар) билан таъминлаш масаласи ҳам кўриб чиқилмоқда.