ОСТОНА, 26 июнь. /“Дунё” АА/. Ўзбекистонда қайта ишланган пластикдан фойдаланган ҳолда йўл қуриш технологияси жорий этилади, деб хабар бермоқда “Дунё” АА мухбири Қозоғистоннинг “Inbusiness.kz” нашрига таяниб.

Янги технология асфальт-бетон қоришмаси таркибига қайта ишланмайдиган пластмасса чиқиндиларининг айрим турларини қўшишга асосланган. Мутахассислар фикрича, бундай ёндашув чиқиндилар ҳажмини қисқартириш билан бирга, йўл қопламасининг мустаҳкамлиги ва хизмат муддатини ошириш имконини беради.

Қайта ишланган пластмасса қоришманинг муҳим таркибий қисми сифатида қўлланилиши натижасида қоплама ташқи таъсирларга нисбатан чидамлироқ бўлади. Дастлабки синовлар янги материалнинг анъанавий асфальтга нисбатан бир қатор техник кўрсаткичлар бўйича устунликка эга эканини кўрсатди.

Жумладан, ишлаб чиқувчилар маълумотига кўра, янги қопламанинг мустаҳкамлиги одатий асфальтга нисбатан 2–3 баробар юқори экани қайд этилган. Шунингдек, унинг сув сингдириш даражаси ҳам сезиларли даражада камайган. Агар стандарт асфальтда мазкур кўрсаткич 1–4 фоизни ташкил этса, «Экоасфальт»да у тахминан 0,25 фоизга тенг.

Муаллифларнинг таъкидлашича, бу кўрсаткичлар янги материалнинг узоқ муддатли хизмат қилишини ва емирилишга юқори даражада бардошли эканини тасдиқлайди.

Лойиҳани амалга ошириш доирасида Чиқиндиларни бошқариш ва циркуляр иқтисодиётни ривожлантириш агентлиги билан ҳамкорлик йўлга қўйилган. Дастлабки синовлар натижалари технологиянинг асосий техник ва эксплуатацион мезонлар бўйича самарадорлигини тасдиқлади.