ТОШКЕНТ, 18 август. / “Дунё” АА/. 2026 йилнинг январь–июль ойларида 4,4 миллион нафар Ўзбекистон фуқароси туристик мақсадларда хорижга чиқди, деб хабар бермоқда “Дунё” АА мухбири.

2025 йилнинг мос даври билан солиштирганда, чет элга туристик сафарлар сони 45,6 минг нафарга кўпайди.

Миллий статистика қўмитаси маълумотларига кўра, Марказий Осиёдаги қўшни давлатлар ташрифлар сони бўйича етакчи бўлди. Хусусан, жорий йилнинг етти ойи давомида Ўзбекистон фуқаролари энг кўп қуйидаги мамлакатларга ташриф буюришди:

Қирғизистон — 1 миллион 981 минг 542 киши;

Қозоғистон — 805 минг 437;

Тожикистон — 744 минг 974;

Россия — 222 минг 605;

Саудия Арабистони — 167 минг 337;

Туркия — 166 минг 893;

БАА — 47 минг 20;

Хитой — 43 минг 581;

Миср — 32 минг 470;

Вьетнам — 28 минг 224 киши.

Мутахассисларнинг фикрича, ушбу статистика Ўзбекистон фуқароларининг хорижий сафарларга бўлган қизиқиши юқори даражада сақланиб қолаётганидан далолат беради. Шу билан бирга, саёҳатлар географияси нафақат Яқин Шарқ, балки Европа ва Осиёнинг оммабоп туристик йўналишларини ҳам босқичма-босқич қамраб олмоқда. Хорижга чиқишлар умумий сонининг ортиши аҳолининг туристик ҳаракатчанлиги кенгаяётганини ҳамда Ўзбекистоннинг халқаро туристик алоқалари мустаҳкамланаётганини тасдиқлайди.