АММОН, 26 август. /“Дунё” АА/. “Jordan Strategy Forum” сайтида “Иорданияда иқтисодий мураккаблик: Ўзбекистон тажрибасидан олинган сабоқлар” сарлавҳали мақола эълон қилинди, деб хабар бермоқда “Дунё” АА мухбири.

Мақолада Иорданиянинг 2012–2024 йиллардаги иқтисодий мураккаблик индекси динамикаси таҳлил қилиниб, Ўзбекистоннинг миллий иқтисодиётни таркибий ўзгартириш ва диверсификация қилиш борасидаги тажрибаси ижобий намуна сифатида тақдим этилган.

Таҳлилда қайд этилишича, Иорданиянинг иқтисодий мураккаблик индекси пасайиб, мамлакат глобал рейтингда 146 та давлат орасида 64-ўриндан 75-ўринга тушган. 2009 йилдан буён мамлакатнинг экспорт портфели бор-йўғи 6 та янги маҳсулот позицияси билан бойиган, холос.

Ўзбекистон эса иқтисодий мураккаблик соҳасида энг юқори ўсиш суръатларидан бирини намойиш этгани алоҳида таъкидланади. Тақдим этилган маълумотларга кўра, Ўзбекистон глобал рейтингда 101-ўриндан 70-ўринга кўтарилиб, ўз экспорт портфели таркибини сезиларли даражада кенгайтирди ва диверсификация қилди.

Кўриб чиқилаётган даврда мамлакат экспорти таркибига 70 та янги маҳсулот позицияси киритилди. Уларнинг улуши умумий экспорт ҳажмининг 10 фоизини ташкил этди, аҳоли жон бошига тўғри келадиган даромаднинг ошишига қўшган ҳиссаси эса 66 АҚШ долларига баҳоланди.

Ўзбекистоннинг умумий экспорт ҳажми 6,6 миллиард доллардан 23,6 миллиард долларгача, ЯИМ ҳажми 115 миллиард долларга етгани, саноатнинг ЯИМдаги улуши эса 19,8 фоиздан 31,8 фоизга ортгани кўрсатиб ўтилган. Ҳарвард университетининг прогнозларига кўра, Ўзбекистон иқтисодиётининг ўртача йиллик ўсиш суръати 2034 йилгача қарийб 5,4 фоизни ташкил этиши кутилмоқда.

Мақолада Ўзбекистон тажрибаси асосан хом ашёга йўналтирилган экспорт моделидан юқори қўшилган қийматга эга, ишлаб чиқариш салоҳиятига таянадиган диверсификациялашган моделга ўтишнинг ёрқин намунаси сифатида кўрсатилган.