ТОШКЕНТ, 12 январь. /“Дунё” АА/. 2025 йил 1 декабрь ҳолатига кўра, Ўзбекистонда Қозоғистон капитали иштирокидаги 1199 та корхона фаолият юритмоқда, деб хабар беради “Дунё” АА мухбири.

Миллий статистика қўмитаси маълумотига кўра, Қозоғистон Ўзбекистонда миллий капитал иштирокидаги корхоналар сони бўйича Хитой, Россия ва Туркиядан кейин тўртинчи ўринда туради.

Қозоғистон капитали иштирокидаги корхоналарнинг энг кўпи савдо соҳасида жамланган бўлиб, умумий ҳисобда 492 тани ташкил қилади. Шунингдек, қўшни мамлакат сармоясининг сезиларли иштироки саноатда (129 та корхона), ахборот ва алоқа (127 та), қурилиш (82 та) ва бошқа иқтисодий фаолият соҳаларида (263 та)га етган.

Бундан ташқари, Қозоғистон бизнеси иштирокидаги корхоналар қишлоқ, ўрмон ва балиқ хўжалиги (21 та), ташиш ва сақлаш (33 та), яшаш ва овқатланиш хизматлари (39 та), ҳамда соғлиқни сақлаш ва ижтимоий хизмат кўрсатиш соҳасида (13 та) фаолият юритмоқда.

Экспертларнинг фикрича, қўшма корхоналар географияси ва тармоқ тузилмасининг кенгайиши Ўзбекистон ва Қозоғистон ишбилармон доиралари ўртасидаги ишончнинг юқори даражасини акс эттиради ва республиканинг хорижий инвесторлар учун жозибадорлиги ортиб бораётганини тасдиқлайди.