ВАРШАВА, 12 сентябрь. /“Дунё” АА/. Наманган вилояти экспортчи корхоналари ҳамда Польша бозорида муваффақиятли фаолият юритаётган ўзбек тадбиркорлари иштирокида онлайн учрашув бўлиб ўтди, деб хабар бермоқда “Дунё” АА мухбири.

Мамлакатимизнинг Польшадаги элчихонаси томонидан ташкил этилган мулоқотда Наманган вилояти ҳокимлиги, Лодзь шаҳридаги Енгил саноатни ривожлантириш агентлиги ходимлари ҳамда турли соҳаларда фаолият юритаётган компания вакиллари иштирок этди.

Учрашувда ўзбек маҳсулотларини Польша ва бошқа Европа мамлакатлари бозорларига олиб чиқиш имкониятлари, маҳаллий қонунчилик талаблари, сертификатлаштириш, логистика ва онлайн-савдони ривожлантириш масалалари атрофлича муҳокама қилинди.

Европа бозорида тажрибага эга тадбиркорлар ўз тавсиялари билан ўртоқлашиб, экспортчилар дуч келаётган асосий муаммолар, жумладан, талабни етарлича таҳлил қилмаслик, узоқ муддатли стратегиянинг йўқлиги ва Европа стандартларига мос сертификатларнинг етишмаслигига эътибор қаратди.

Лодзь шаҳридаги логистика хаби имкониятлари, омборхоналардан фойдаланиш ва ҳужжатларни расмийлаштириш тартиблари алоҳида тақдим этилди.

Шунингдек, иштирокчиларга Ўзбекистонда экспорт фаолиятини ривожлантириш бўйича яратилган шароитлар ва давлат томонидан кўрсатилаётган қўллаб-қувватлаш чоралари ҳақида маълумот берилди.

Иштирокчилар сертификатлаштириш, виза тартиблари ва логистика бўйича ўзларини қизиқтирган саволларга аниқ жавоблар олди. Томонлар мунтазам алоқаларни сақлаш ва амалий ҳамкорликни изчил давом эттиришга келишиб олди.