ВАШИНГТОН, 4 ноябрь. /“Дунё” АА/. 3 ноябрь куни АҚШда бўлиб ўтган оралиқ сайловлар Демократлар партиясининг яққол ғалабаси билан якунланди, деб хабар бермоқда “Дунё” АА мухбири “AP” агентлигига таяниб.

Демократлар партияси Конгресснинг иккала палатаси устидан назоратни қўлга киритиб, Дональд Трамп президентлигининг қолган икки йили учун Вашингтондаги сиёсий кучлар нисбатини ўзгартириб юборди.

Демократлар Канзас, Айове, Техас, Огайо, Мэн, Шимолий ва Жанубий Каролинада ғалаба қозониб, Сенатда камида еттита қўшимча ўринни эгаллади. Эътиборлиси, партиянинг ушбу муваффақиятлари анъанавий равишда республикачиларнинг таянчи ҳисобланган штатларга тўғри келди.

Асосий шов-шувлардан бири Жеймс Талариконинг Техасдаги ғалабаси бўлди. У 1988 йилдан буён ушбу штатдан Сенатга сайланган илк демократга айланди. Бундан ташқари, демократ Жина Инохоса губернаторлик сайловларида ғолиб чиқиб, бу лавозимни эгаллаган келиб чиқиши лотин америкалик бўлган биринчи аёл ҳамда сўнгги ўттиз йил ичида Техаснинг илк демократ губернатори бўлди.

Бошқа штатларда ҳам тарихий натижалар қайд этилди. Мичиганда Абдул Ал-Сайид ғалаба қозонди – у АҚШ Сенатидаги биринчи мусулмон бўлади. Унинг ғалабаси Мичиган штати 2024 йилги президентлик сайловларида Дональд Трампни қўллаб-қувватлагани билан аҳамиятлидир. Вакиллар палатасида эса демократлар 2024 йилда амалдаги президентни 18 фоиз пунктгача бўлган устунлик билан қўллаб-қувватлаган қатор округларда ғалабани илиб кетди.

Америка ОАВларининг баҳолашича, республикачилар мағлубиятининг асосий сабабларидан бири сайловчиларнинг яшаш харажатлари ошиб кетиши, ёқилғи нархлари ва Эрон билан уруш оқибатларидан норозилиги бўлган. “AP” сўровномасига кўра, кўплаб америкаликлар Оқ уй устидан парламент назоратини кучайтириш тарафдори.

Дональд Трамп “Fox News” телеканалига берган интервьюсида натижаларга изоҳ берар экан, демократлар сайлов кампаниясини яхши ўтказганини тан олди, бироқ мағлубият учун жавобгарликни ўз партиясидан кўрсатилган номзодлар зиммасига юклади. Шунингдек, у Эрон билан уруш ва ёқилғи нархлари ошиши овоз бериш якунларига таъсир кўрсатганини таъкидлади.

“The New York Times” газетасида чоп этилган бошқа бир интервьюда Америка етакчиси сайлов натижаларини қабул қилиши ва демократлар билан ҳамкорликка тайёрлигини билдирди.

“Биз демократлар билан бирга ишлаймиз ва ҳамкорликдан умидвормиз. Эҳтимол, бирор масала бўйича келишувга эришармиз”, – дея унинг сўзлари келтирилган нашрда.

Конгрессда кўпчилик ўринни қўлга киритган демократлар эндиликда қонунчилик кун тартибига таъсир кўрсатиш, президентнинг қатор тайинловлари, жумладан, судьялик лавозимларига тўсқинлик қилиш ҳамда маъмуриятга нисбатан парламент суриштирувларини ўтказиш имкониятига эга бўлади.

“NBC” телеканали сурати