БЕЛГРАД, 15 сентябрь. /“Дунё” АА/. Сербия президенти Александр Вучич 27 сентябрь куни давлат раҳбари лавозимини тарк этиши, шундан сўнг навбатдан ташқари парламент сайловларига тайёргарлик кўришда оддий фуқаро сифатида иштирок этишини маълум қилди, деб хабар бермоқда “Дунё” АА мухбири.

“27 сентябрь куни мен президентлик ваколатларимни зиммамдан соқит қиламан”, – деди у “Pink” телеканали эфирида.

У шундан сўнг президентлик лавозимидан ташқарида парламент сайловларига тайёргарлик кўришга эътибор қаратишини айтди.

9 сентябрь куни Александр Вучич Сербиянинг бир палатали парламенти – Халқ скупшинасини тарқатиб юбориш тўғрисидаги қарорни тасдиқлади ва муддатидан олдинги сайловларни 25 октябрга белгилади.

Ҳукмрон Сербия тараққийпарвар партияси раиси Милош Вучевич бўлажак президент сайловларда партия рўйхатига бошчилик қилишини ва бош вазир лавозимига ушбу сиёсий кучнинг номзоди бўлишини айтди.

Сербияда муддатидан олдинги сайловлар 2024 йил ноябрь ойида Нови-Сад шаҳридаги темир йўл вокзалида бостирма қулаб, 16 киши ҳалок бўлганидан кейин бошланган, ҳукуматга қарши давом этаётган оммавий норозилик намойишлари фонида бўлиб ўтади.

Александр Вучич 2014 йилдан 2017 йилгача Сербия бош вазири лавозимида ишлаган. У 2017 йилда президент этиб сайланган ва 2022 йилда қайта сайланган. Унинг амалдаги президентлик муддати 2027 йил май ойида тугайди. Сербия Конституциясига кўра, президент ўз лавозимини кўпи билан икки марта беш йиллик муддатга эгаллаши мумкин.