ПАРИЖ, 11 сентябрь. /“Дунё” АА/. Франция футбол федерацияси ФИФА раҳбариятига ишончи қолмаганини айтиб, ташкилот президенти сайловида Жанни Инфантинони қўллаб-қувватлашдан бир овоздан воз кечди, деб хабар бермоқда “Дунё” АА мухбири.

“The Guardian” нашрининг ёзишича, бу қарор 11 сентябрь куни жаҳон чемпионати атрофидаги воқеалар ҳамда ФИФАнинг турнирлар, жумладан, ЖЧ тижорий ҳуқуқларининг 20 фоизини хусусий сармоядорларга сотиш бўйича бекор қилинган режасидан сўнг қабул қилинган.

Франция футбол федерацияси президенти Филипп Диаллонинг таъкидлашича, амалдаги раҳбарнинг ташаббуслари футбол обрўси ва бирлигига жиддий путур етказган, ФИФА президентига бўлган ишонч эса барбод бўлган.

Унинг сўзларига кўра, Франция ўзини ФИФАнинг жаҳон футболини бошқариш тамойиллари ҳақидаги тасаввурларига мос келмайдиган йўналишига қарши чиқишга ҳақли деб билади. Шу билан бирга, федерация номзодлар кўрсатишнинг сўнгги муддати — 18 ноябргача муқобил номзод топишда иштирок этиш ниятида.

Бир кун аввал 100 мингдан ортиқ киши Жанни Инфантино устидан шикоятга қўшилиб, ФИФА президенти, камида, ўз ваколатини суиистеъмол қилгани, сиёсий бетарафлик ва садоқат бурчини бузганини даъво қилган эди.

АҚШ Президенти Дональд Трампнинг аралашувидан сўнг ФИФА америкалик ҳужумчи Фоларин Балоганнинг дисквалификациясини бекор қилиши билан боғлиқ жаҳон чемпионатидаги воқеалар кескинлик омилларидан бири бўлди. Аввалроқ ФИФА ўз интизом қўмитасининг қарори амалдаги қоидаларга мувофиқ қабул қилинганини маълум қилганди.

Танқидлар кучайиб бораётганига қарамай, Жанни Инфантино қайта сайланиш учун етарлича қўллаб-қувватловга эга бўлиб турибди, деб хабар берди “Reuters”га футбол тузилмаларидаги муҳокамалардан хабардор бир неча манба. Айниқса, кичик футбол федерациялари орасида ва Европадан ташқарида унинг мавқеи баландлигича қолмоқда.

ФИФА конгрессида 211 миллий федерациянинг ҳар бири биттадан овозга эга. Шу боис Европа жамоаси бошқа қитъаларнинг қўллаб-қувватлашига эришиши керак. Ҳозирча бундай коалицияни туза оладиган ва Жанни Инфантино билан реал рақобат қила оладиган номзод пайдо бўлмади.

Потенциал даъвогарлардан бири сифатида тилга олинган “Пари Сен-Жермен” клуби президенти Носир ал-Хулайфий ўз вакили орқали сайловда номзодини қўйиш ниятида эмаслигини маълум қилди. Бошқа эҳтимолий номзодлар ҳозирча сайловда иштирок этишга тайёр эканини билдирмади.

Шу муносабат билан Жанни Инфантинонинг рақиблари стратегияни ўзгартириб, эътиборни нафақат уни четлатишга, балки ФИФА президенти ваколатларини чеклашга ҳам қаратиш имкониятини кўриб чиқмоқда. Хусусан, йирик тижорий қарорлар устидан қатъийроқ назорат ўрнатиш ва ташкилот раҳбарияти ичида ваколатларнинг бир қисмини қайта тақсимлаш масалалари муҳокама қилинмоқда.

ФИФА президенти сайлови 2027 йил 18 март куни Марокаш пойтахтида бўлиб ўтади. Номзодлар эса жорий йилнинг 18 ноябрига қадар кўрсатилиши лозим.

“Reuters” агентлиги сурати