МЮНХЕН, 26 май. /“Дунё” АА/. Германиянинг Мюнхен шаҳрида Соҳибқирон Амир Темур таваллудининг 690 йиллигига бағишланган Иккинчи "Заковат" интеллектуал турнири ўтказилди, деб хабар бермоқда "Дунё" АА мухбири.

Мамлакатимизнинг Германиядаги дипломатик миссияси ташаббуси билан Ташқи ишлар вазирлиги, “Ватандошлар” жамоат фонди, “Karavan e.V” ўзбек-немис маданий жамияти ва “Заковат” клуби ҳамкорлигида ташкил этилган ушбу йирик тадбирда 300 нафардан ортиқ фаол ҳамюртимиз иштирок этди.

Германиянинг турли ҳудудларидан келган, ҳар бири 6 нафар билимдондан иборат 20 га яқин жамоа тарих, маданият, илм-фан ва умумий дунёқарашга оид қизиқарли саволларга жавоб бериш орқали ўз интеллектуал салоҳиятини намойиш этди.

Анжуманнинг очилиш маросимида сўзга чиққанлар юртимизда ёшларни қўллаб-қувватлаш ва хорижда таҳсил олишлари учун яратилаётган шароитлар ҳақида тўхталдилар.

“Ватандошлар” жамоат фонди бошқаруви раиси Одилжон Саттаров Германиядаги юртдошлар билан истиқболли лойиҳаларни амалга оширишга тайёрлигини билдирди. Баҳслар якунига кўра, ғолибларга ноутбуклар, иккинчи ўрин соҳибларига планшетлар, учинчи ўрин эгаларига эса смартфонлар топширилди. Шунингдек, меҳмонларга Фонд журнали ҳамда немис тилидаги “100 факт” буклети тақдим этилди.

Тадбир доирасида “Karavan e.V.” жамияти ва “Ватандошлар” фонди ўртасида Германияда миллий қадриятларимизни кенг тарғиб қилишга қаратилган ҳамкорлик Меморандуми имзоланди.

Бундан ташқари, Ўзбекистон Президенти томонидан олиб борилаётган гендер тенглик сиёсатини тарғиб қилиш мақсадида Германиядаги ўзбек хотин-қизлар ташкилотлари раҳбарлари билан алоҳида учрашув ўтказилди. Ўзбекистондан ташриф буюрган таниқли хонанда Ботир Қодиров бошчилигидаги санъаткорларнинг чиқишлари эса турнирга ҳақиқий байрамона шукуҳ бахш этди.