БИШКЕК, 23 июнь. /“Дунё” АА/. Бугун ҳам юртимизда катта футбол байрами давом этади: Жаҳон чемпионати доирасида соат 22:00да бошланадиган Ўзбекистон–Португалия ўйинини нафақат юртимиз, балки бутун Марказий Осиё халқлари интизорлик билан кутмоқда, деб хабар бермоқда “Дунё” АА мухбири.

Мамлакатимизнинг Қирғизистондаги элчихонаси дипломатлари ҳам Ўзбекистон миллий футболини кенг тарғиб этиш мақсадида турли саъй-ҳаракат ва лойиҳаларни амалга оширмоқда.

Хусусан, элчихона вакиллари Ўзбекистон Президенти Администрацияси ҳузуридаги Оммавий ахборот воситалари учун контент тайёрлаш маркази томонидан тайёрланган “Ўзбек футболи: орзу, сабр ва ғурур тарихи” номли ҳужжатли фильмни Қирғизистонда кенг тарғиб қилмоқда.

Футбол бўйича миллий терма жамоамизнинг ривожланиши, халқаро майдондаги ютуқлари ҳамда илк бор жаҳон чемпионатидаги иштирокига бағишланган ушбу фильм бугун Ўзбекистон–Португалия ўйини арафасида Қирғизистон Миллий телерадиокомпанияси орқали эфирга узатилади.

Мазкур ҳужжатли фильм 24 июнь соат 13:20да ҳамда 27 июнь куни соат 19:00да Қирғизистоннинг ТВ-15 халқаро телеканалида ҳам намойиш қилиниши режалаштирилган.

Шу билан бирга, ушбу фильм Қирғизистондаги ўзбек миллий маданий марказларида ҳамда кенг маҳаллий жамоатчилик орасида ҳам тақдим этилиши кўзда тутилган.

Эслатиб ўтамиз, жаҳон чемпионатининг 1-тур баҳсларида Ўзбекистон Колумбияга 3:1 ҳисобида мағлубиятга учраган бўлса, Португалия ва Конго терма жамоалари ўртасидаги ўйин 1:1 ҳисобида дуранг натижа билан якунланган.