ЦЮРИХ, 22 июнь /“Дунё” АА/. ФИФА ўзининг расмий YouTube саҳифасида Ўзбекистон миллий терма жамоаси аъзолари – Рустам Ашурматов ва Достонбек Ҳамдамов иштирокидаги қизиқарли видеолавҳа эълон қилди, деб хабар бермоқда “Дунё” АА мухбири.

Намойиш қилинган лавҳада 2009 йилда жаҳон юлдузи Криштиану Рональдунинг юртимизга ташрифи, бўлажак футболчиларимиз билан учрашуви ҳамда у билан боғлиқ ёрқин хотиралари ҳақида ҳикоя қилинади.

“Рональдунинг ташрифи кутилмаган воқеа бўлган эди. У келиб биз билан футбол ўйнаган, ўшанда биз 13 ёшда эдик. Бу унутилмас лаҳза эди”, – дея хотирлайди футболчилар.

Ўшанда эндигина футболга қадам қўяётган ёш болалар эндиликда Жаҳон чемпионати доирасида 23 июнь куни Португалия терма жамоасига қарши майдонга тушишади. Видеода футболчилар ўтган йиллар давомида катта тажриба тўплагани ва бўлажак учрашувда фақат ғалаба учун курашишини алоҳида таъкидлаган.

“Рональду юртимизга келганида футболни энди ўрганаётган бола эдик. Ҳозир эса Жаҳон чемпионатидамиз. Ўйин бошланганда Рональду бизнинг кумиримиз эмас, балки рақибимизга айланади. Биз доимо Жаҳон чемпионатида қатнашишни орзу қилганмиз ва муносиб ўйин кўрсатиш учун қўлимиздан келганини қиламиз”, – дея футболчилар фикрлари видеолавҳада келтирилган.

Тез орада ушбу интервьюнинг ўзбек тилидаги тўлиқ варианти “Дунё” ахборот агентлигининг расмий саҳифаларида эълон қилинади.