ТОШКЕНТ, 5 ноябрь. /“Дунё” АА/. Бош консулхона ташаббуси билан мамлакатимизда Россиянинг Б.Н.Ельцин номидаги Президент кутубхонасининг электрон ўқув залини очиш борасидаги лойиҳа Ўзбекистон Миллий кутубхонаси томонидан қўллаб-қувватланиб, муваффақиятли амалга оширилди, деб хабар бермоқда “Дунё” АА мухбири.

Қайд этилишича Б.Н.Ельцин номидаги Президент кутубхонасининг электрон ўқув зали ресурсларидан фойдаланиш имконияти муваффақиятли синовдан ўтказилди.

Мазкур ташаббуснинг ҳаётга татбиқ этилиши Миллий кутубхона фойдаланувчиларининг Россия ва жаҳон ахборот ресурсларидан кенг фойдаланиши учун муҳим имконият яратиши, шунингдек, икки мамлакат ўртасида кутубхоначилик соҳасидаги ҳамкорликни янада мустаҳкамлашга хизмат қилади.

Санкт-Петербург шаҳрида жойлашган Б.Н.Ельцин номидаги Президент кутубхонаси Россия давлатчилиги, фан ва маданияти тарихига оид рақамли тўпламлардан эркин фойдаланишни таъминловчи умумдавлат электрон ресурси ҳисобланади. Кутубхона фонди 1,2 миллиондан ортиқ сақлов бирлигини ўз ичига олади. Ҳозирга қадар дунёнинг 15 та мамлакатида Президент кутубхонасининг электрон ўқув заллари очилган бўлиб, 2026 йил октябрь ойидан бошлаб улар қаторига Ўзбекистон Миллий кутубхонаси ҳам қўшилди.