САМАРҚАНД, 15 сентябрь. /“Дунё” АА/. Бугун бутун дунё шахмат ишқибозларининг нигоҳи юртимизга, тарих ва тамаддун бешиги бўлган қадимий Самарқанд шаҳрига қаратилган, деб хабар бермоқда “Дунё” АА мухбири.

Айни пайтда Самарқандда Халқаро шахмат федерацияси (ФИДЕ)нинг 46-Бутунжаҳон шахмат олимпиадаси бошланган. Олимпиада дастурига мувофиқ, 10–17 сентябрь кунлари III Бутунжаҳон шахмат паралимпиадаси ҳамда 15–27 сентябрь кунлари 46-Бутунжаҳон шахмат олимпиадаси бўлиб ўтади.

Ҳар икки йилда ўтказиладиган бу галги олимпиадада 400 та жамоа иштирок этиш истагини билдирган. Икки йил олдин Венгрияда ўтказилган 45-Бутунжаҳон шахмат олимпиадасида 380 та жамоа қатнашган эди. Бу гал Самарқандда 208 та эркаклар жамоаси ва 192 та хотин-қизлар жамоаси ўзаро беллашади.

Самарқандда бугун ФИДЕнинг вақтинчалик раҳбари Вишванатан Ананд ҳамда Ўзбекистон шахмат федерацияси раиси биринчи ўринбосари Алишер Саъдуллаев иштирокида матбуот анжумани ўтказилиши белгиланган. Кечки пайт “Боқий шаҳар” марказидаги амфитеатрда 46-Бутунжаҳон шахмат олимпиадасининг тантанали очилиш маросими ўтказилади.

 Тадбирлар доирасида Самарқандда ФИДE Конгресси ва сайловлари ҳам бўлиб ўтади. Муҳим тадбирлардан яна бири 24 сентябрь куни ФИДEнинг “2026 – Таълимда шахмат йили” доирасида педагоглар, сиёсатчилар ва тадқиқотчиларни бирлаштирадиган “Таълимда шахмат” саммити ўтказилади.