ТОШКЕНТ, 4 октябрь. /“Дунё” АА/. 5–6 октябрь кунлари пойтахтимиздаги Ёшлар ижод саройида “Киберхавфсизлик саммити – Марказий Евроосиё, CSS 2026” халқаро тадбири доирасида “Cyberkent 4.0” кибермусобақаси бўлиб ўтади, деб хабар бермоқда “Дунё” АА мухбири.

Мусобақа 7 та йўналишни қамраб олади: Red Team – ҳужумчи жамоа, Blue Team – ҳимоячи жамоа, очиқ топшириқлар (CTF Master, The AI Underworld, Attack Surface AI), Bug Bounty, CyberQuiz, Cybermuloqot ва Cybermergan.

Red Team ва Blue Team йўналишларида 1-ўрин соҳиби 50 миллион сўм, 2-ўрин соҳиби 30 миллион сўм, 3-ўрин соҳиби 10 миллион сўм миқдорида мукофот билан тақдирланади.

Очиқ топшириқларнинг ҳар бир йўналишида 1-ўрин учун 10 миллион, 2-ўрин учун 8 миллион, 3-ўрин учун 6 миллион, 4-ўрин учун 4 миллион ва 5-ўрин учун 2 миллион сўм мукофот белгиланган. Шунингдек, иштирокчилар учун 200 дан ортиқ эсдалик совғалари тайёрланган.

Ташкилотчилар тадбирни ёритиш учун журналистлар, блогерлар ва оммавий ахборот воситалари вакилларини таклиф этмоқда.