САМАРҚАНД, 23 июнь. /"Дунё" АА/. Самарқандда бўлиб ўтаётган БМТнинг Давлат хизматлари форуми доирасида "Ўзбекистон Республикаси давлат органлари фаолияти самарадорлигини баҳолаш" дастури ғолибларини тақдирлаш маросими бўлиб ўтди, деб хабар беради "Дунё" АА мухбири.

Тадбирда давлат идоралари вакиллари, экспертлар, журналистлар, жамоатчилик вакиллари иштирок этди.

Дастур Ўзбекистон Президенти Шавкат Мирзиёев томонидан давлат бошқарувини модернизация қилиш, давлат органларини очиқ, ҳисобдор ва фуқароларга йўналтирилган институтларга айлантириш мақсадида амалга оширилаётган кенг кўламли ислоҳотлар доирасида амалга оширилмоқда.

Дастур давлат органлари фаолиятини холисона баҳолаш, уларнинг самарадорлигини ошириш, бошқарув тизимидаги етакчиларни рағбатлантириш ва давлат хизматида сифат маданиятини ривожлантиришга қаратилган.

Тақдирлаш маросимининг иккинчи босқичида 17 та вазирлик ва идоралардан 140 нафар вакил иштирок этди. Баҳолаш Бирлашган Араб Амирликларидан 38 нафар эксперт ва баҳоловчилар, Ўзбекистондан 22 нафар мутахассис ҳамда БААдан 5 нафар халқаро ҳакамлар иштирокида саккиз номинация бўйича ўтказилди.

Иштирокчиларнинг иши 178 та ташриф давомида, шу жумладан суҳбатлар ва бевосита кузатишлар орқали баҳоланди. Баҳолаш жараёнининг умумий давомийлиги 15 000 иш соатидан ошди.

2024 йил август ойида маҳаллий ва халқаро тренерлар иштирокида ўқув курслари ташкил этилиб, уларда 400 дан ортиқ киши иштирок этди. Ўқув машғулотларининг умумий ҳажми 19 000 соатдан ошди. Ўтган йили сентябрь ойида дастурнинг расмий очилиши ва quality.argos.uz рақамли платформасининг ишга туширилиши бўлиб ўтди, унда барча вазирликлар рўйхатдан ўтказилди. Октябрь ойида номзодларнинг сўровномалари таҳлил қилинди, суҳбатлар ўтказилди ва дастлабки натижалар шакллантирилди.

Якуний натижалар халқаро ҳакамлар ҳайъати томонидан мустақил текширилгандан сўнг Ўзбекистон томонига топширилди.

Дастур қуйидаги асосий номинацияларни қамраб олди: "Намунали вазирлик" ва алоҳида тоифалар, жумладан "Намунали вазир ўринбосари", "Намунали менежер", "Намунали бўлим бошлиғи", "Ривожланиш ва кадрлар бўлимининг намунавий раҳбари", "Намунали мутахассис", "Намунали аёл мутахассис" ва "Намунали ёш мутахассис".

Баҳолаш жараёнида номзоднинг шахсий ютуқлари, етакчилик фазилатлари, инновацион ёндашувлари ва жамият тараққиётига қўшаётган ҳиссасига алоҳида эътибор қаратилди.

Баҳолашнинг асосий мезонлари сифатида стратегик вазифаларни амалга ошириш, инновацияларни жорий этиш, ресурслардан самарали фойдаланиш, шунингдек, жамиятга таъсири, фуқароларнинг ишонч даражаси ва миллий тараққиётга қўшган ҳиссаси белгиланди.

"Ўзбекистон Республикаси давлат органлари фаолияти самарадорлигини баҳолаш" дастури нафақат рағбатлантириш тизими, балки замонавий, масъулиятли ва фуқарога йўналтирилган давлат хизматини шакллантириш йўлидаги қадамдир. Юқори сифатли менежмент ижтимоий барқарорлик, барқарор иқтисодий ўсиш ва мамлакатнинг халқаро нуфузини мустаҳкамлашнинг асоси сифатида қаралмоқда.