ТОШКЕНТ, 1 июль. /"Дунё" АА/. Бугун Тошкент шаҳрида бож олинмайдиган "Diplomatic Shop" савдо дўконининг расмий очилиш маросими бўлиб ўтди, деб хабар беряпти "Дунё" АА мухбири.

У фақат Ўзбекистонда аккредитациядан ўтган дипломатик ваколатхоналар ходимлари учун мўлжалланган.

Очилиш маросимида Ташқи ишлар вазирлиги ходимлари, дипломатик миссиялар раҳбарлари ва вакиллари, шунингдек, ишбилармон доиралар вакиллари иштирок этди.

"Diplomatic Shop" юқори сифатли товарларнинг кенг ассортиментини божсиз нархларда таклиф этади. Магазин етакчи жаҳон брендларининг маҳсулотларини таклиф этади – парфюмерия ва косметикадан тортиб заргарлик буюмлари ва аксессуарларигача.

Магазин дипломатик ваколатхоналар ходимлари ва уларнинг оила аъзоларининг зарур товарларни харид қилишлари учун арзон ва қулай шароитлар яратиш мақсадида ташкил этилди.

Савдо шохобчаси Ўзбекистон Ташқи ишлар вазирлиги Дипломатик хизмат хизмати бюроси биносида Алишер Навоий кўчаси, 10-уй манзилида жойлашган. "Diplomatic Shop" душанбадан жумагача соат 9:00 дан 18:00 гача ишлайди.

Андрин Финк, Швейцария элчиси ўринбосари, ҳамкорлик бўлими бошлиғи

– Бугун очилиш маросимида кўплаб дипломатик ҳамжамият вакиллари қатнашди, бу эса, менимча, Тошкентда бундай магазин очилишига қизиқиш юқори эканидан далолатдир. Шунингдек, "Diplomatic Shop" раҳбарияти дипломатик ҳамжамият эҳтиёжларига чин дилдан қизиқиш билдираётгани ва уларнинг сўровларига жавоб берадиган ассортиментни таклиф қилишга интилаётганидан хурсандман.

Умуман олганда, мен ушбу лойиҳанинг муваффақиятли ривожланишига ишонаман. Тадбирни ташкил этишга келсак, барчаси юқори даражада бўлиб ўтди. Айниқса, Ўзбекистон миллий рақслари менда жуда илиқ таассурот қолдирди.

Антти Карттунен, ЕХҲТнинг Ўзбекистондаги лойиҳалари координатори офиси раҳбари, элчи:

– Тошкентда янги дипломатик савдо шохобчасининг очилиши жуда ёқимли ва дўстона руҳда ўтди. Ишончим комилки, ушбу лойиҳа дипломатик ҳамжамият томонидан ижобий қабул қилинади, чунки бу ердан турли тадбирлар учун юқори сифатли маҳсулотларни харид қилиш мумкин бўлади.

Сабина Махл, Бирлашган Миллатлар Ташкилотининг Ўзбекистондаги доимий координатори:

– Бунгача Тошкентдаги бундай савдо дўконлари билан таниш эмас эдим ва уларнинг мавжудлигидан ҳам хабарим йўқ эди. Шунинг учун пойтахтда бундай янги нуқта пайдо бўлганини кўриш мен учун айниқса ёқимли бўлди. Ташкилотчиликка келсак, тадбир юқори савияда ўтди, ажойиб дастур тайёрланган. Бу савдо магазинини кенгроқ аудиторияга янада яқинроқ таништириш ҳақиқатдан ҳам ажойиб ғоя.