ГУЛИСТОН, 6 сентябрь. /"Дунё" АА/. Россиянинг Томск вилояти губернаторининг агросаноат сиёсати ва табиатдан фойдаланиш масалалари бўйича ўринбосари Михаил Ратнер бошчилигидаги делегацияси 28-29 август кунлари Гулистон шаҳрида бўлиб ўтган Халқаро инвестиция форумида иштирок этди, деб хабар қилмоқда "Дунё" АА мухбири.

Делегация таркибидан Томск бизнесининг озиқ-овқат саноати, ўрмон хўжалиги комплекси сувни тозалаш бўйича замонавий ечимларни таклиф қиладиган корхоналар раҳбарлари ўрин олди.

– Томск вилояти учун Ўзбекистон ташқи иқтисодий майдондаги асосий ўйинчилардан биридир, – деди губернатор ўринбосари Михаил Ратнер. – Биз кўплаб соҳаларда ҳамкорлик қилаяпти. Ўтган йил натижаларига кўра, республика минтақамизнинг иккинчи савдо-иқтисодий ҳамкори бўлди. Томск экспортининг асосини ёғоч ва ёғоч маҳсулотлари ташкил этади. Асосий импорт товарлари озиқ-овқат маҳсулотларидир.

Ташриф доирасида Томск вилояти делегацияси ҳудуддаги Эркин иқтисодий зонага ташриф буюрди. Кулолчилик ва чарм буюмлардан тортиб, желатин, оқсил ва ҳатто атиргулларгача бўлган кенг турдаги маҳсулотларни ишлаб чиқарувчи "Peng Sheng" кластерининг ишлаб чиқариш майдонлари кўздан кечирилди. Делегация аъзолари "Султон" фермер хўжалигида ҳам бўлди.

Томск вилояти озиқ-овқат ишлаб чиқариш учун хомашё, хусусан, маҳсулотларни чуқур қайта ишлаш бўйича ўз тажрибаси билан ўртоқлашишга тайёр экани таъкидланди. Сибир қишлоқ хўжалиги илмий-тадқиқот институти кенг халқаро алоқаларга ва қишлоқ хўжалиги экинлари селекцияси ва янги технологияларни ишлаб чиқиш соҳасидаги ютуқларга эга. Томск вилояти Ўзбекистонга Сибирдаги энг йирик мева ва резавор мевали питомник "Бакчарское" ОАЖдан резавор экинлар кўчатларини ҳам етказиб бериши мумкин.

Шунингдек, чорвачилик соҳасида ҳамкорлик йўналишлари ва ўзбекистонлик шериклар билан ҳамкорликнинг бошқа имкониятлари, хусусан, электроника ва учувчисиз технологияларнинг минтақавий саноат кластерини шакллантириш масалалари муҳокама қилинди.

Томск вилояти делегациясининг мазкур форумда иштирок этиши Россиянинг ушбу вилояти губернатори Владимир Мазурнинг 2024 йил ноябрь ойида Ўзбекистонга қилган ташрифи, Сирдарё ва Томск вилоятлари ўртасидаги кўп қиррали алоқалар тобора кучайиб бораётганининг яққол давоми бўлди.