ТОШКЕНТ, 21 сентябрь. /“Дунё” АА/. Ўзбекистон ва Германия вакиллари ўртасида давлат кўчмас мулкини бошқаришни такомиллаштириш масаласига бағишланган онлайн-учрашув бўлиб ўтди, деб хабар бермоқда “Дунё” АА мухбири.

Музокараларда Ўзбекистон Давлат активларини бошқариш агентлиги, Германия Федерал мулкини бошқариш агентлиги (BImA), Федерал молия вазирлиги, Халқаро ҳамкорлик жамияти (GIZ) ва “Indecon Consulting” компанияси вакиллари иштирок этди.

Ўзбекистон Давлат активларини бошқариш агентлиги раҳбари Соҳибжон Муродов таъкидлаганидек, немис экспертлари кўмагида илгари давлат мулкини бошқариш ва хусусийлаштириш соҳасидаги қонун лойиҳалари ҳамда юртимиздаги биринчи корпоратив бошқарув кодекси тайёрланган эди.

Ҳамкорликнинг янги босқичи доирасида давлат кўчмас мулкини бошқариш, жумладан, объектларни баҳолаш, уларни ижарага бериш ва сотиш ҳамда бўш турган бинолардан унумли фойдаланиш бўйича қўшма лойиҳалар амалга оширилди.

Мулоқотда Федерал молия вазирлиги Ўзбекистон билан ривожланиб бораётган ҳамкорликни юқори баҳолаб, мамлакатга кўмак бериш 2009 йилдан буён давом этаётганини таъкидлади.

BImA вакиллари федерал объектларни бошқаришнинг Германия тажрибасини тақдим этди ҳамда Ўзбекистон томони билан давлат кўчмас мулкининг рақамли реестрини яратиш ва биноларга техник хизмат кўрсатиш масалаларини муҳокама қилди.

Германия вакиллари давлат корхоналарини ислоҳ қилиш ва хусусийлаштиришнинг 2026–2030 йилларга мўлжалланган стратегиясини ишлаб чиқиш ҳамда давлат иштирокидаги компанияларда корпоратив бошқарувни такомиллаштиришда кўмаклашишга тайёрлигини билдирди.