САМАРҚАНД, 21 сентябрь. /“Дунё” АА/. Самарқандда давом этаётган 46-Бутунжаҳон шахмат олимпиадасида 5-тур баҳслари якунланди, деб хабар бермоқда “Дунё” АА мухбири.

Унда Ўзбекистоннинг асосий эркаклар жамоаси Венгрия устидан йирик 4:0 ҳисобида ғалаба қозониб, мусобақадаги етакчилик мавқеини мустаҳкамлади.

Нодирбек Абдусатторов, Жавоҳир Синдоров, Нодирбек Ёқуббоев ва Шамсиддин Воҳидовдан иборат Ўзбекистон-1 жамоаси 5 турдан сўнг 10 очко билан Ҳиндистон ва Германия билан биргаликда пешқадамлар сафида бормоқда.

Ўзбекистон-2 жамоаси ҳам навбатдаги баҳсда Филиппинни 2,5:1,5 ҳисобида мағлуб этди. Жамоа 8 очко билан 202 та терма жамоа орасида 17-ўринни эгаллаб турибди. Ўзбекистон-3 эса Австрия билан дуранг ўйнаб, 7 очко жамғарган ва 40-поғонадан жой олган.

Аёллар ўртасида Ўзбекистон-1 АҚШ билан дуранг қайд этди. Ўзбекистон-2 Тунисни 4:0, Ўзбекистон-3 эса Мадагаскарни 3,5:0,5 ҳисобида мағлуб этди.

Бешинчи турдан кейин Ўзбекистон-1 аёллар жамоаси 9 очко билан қўшимча кўрсаткичларга кўра 6-ўринда бормоқда. Ўзбекистон-2 ва Ўзбекистон-3 жамоалари эса 6 очкодан жамғарган.

Шахмат мухлисларини 6-турда қизиқарли баҳслар кутиб турибди. Хусусан, Олимпиада пешқадамлари Ўзбекистон-1 ва Ҳиндистон гроссмейстерлари 6-турда ўзаро беллашади. Ушбу турда ғалаба қозонган терма жамоа ғолиблик учун ўз имкониятларини янада оширади.