КРОТОШИН, 10 сентябрь. /"Дунё" АА/. Жорий йилнинг 7-8 сентябрь кунлари Польшанинг Кротошин шаҳрида сумо бўйича йигирма бешинчи жаҳон чемпионати бўлиб ўтди, деб хабар бермоқда "Дунё" АА мухбири.

Унда 33 та мамлакатдан 200 га яқин сумо спорти вакиллари куч синашди. Эътиборлиси, мазкур дунё биринчилигида тарихда илк марта ўзбек сумочилари ҳам иштирок этди.

Чемпионатда Ўзбекистон шарафини эркаклар ўртасида 80 килограммгача вазн тоифасида Абдуқодир Усмонов, 115 килограммгача вазнда Махмуджон Максудов, аёллар ўртасидаги беллашувларда эса 73 килограммгача бўлган оғирликда Фаридахон Тулашова ва мутлақ оғир вазнда Дурдона Абдужабборова ҳимоя қилди.

Қувонарлиси, ҳамюртимиз Дурдона Абдужабборова ушбу жаҳон чемпионатида Ўзбекистон сумо спорти тарихида жаҳон чемпионатида биринчи бронза медалини кўлга киритган спортчига айланди. У баҳслар давомида Эстония, Польша ва Украина спортчилари билан беллашди. Натижада икки нафар рақибасини мағлуб этди. Шунингдек, икки марта мағлубиятга учради. Якунда вакиламиз жаҳон чемпионатининг совриндорлари қаторидан жой олди.