ЕКАТЕРИНБУРГ, 26 май. /"Дунё" АА/. Ўзбекистон Бош консулхонаси ходимлари Россиянинг Ханти-Мансийск автоном округи Меҳнат ва бандлик департаменти директори ўринбосари Алексей Мокринский ва ушбу ҳудуддаги йирик компаниялар раҳбарлари билан онлайн музокаралар ўтказишди, деб хабар қилмоқда "Дунё" АА мухбири.

Мулоқот Ўзбекистон Президентининг "Хорижда меҳнат фаолиятини амалга ошириш жараёнларини тартибга солиш бўйича қўшимча чора-тадбирлар тўғрисида"ги қарорида белгиланган вазифалар ижросини таъминлаш доирасида ташкил этилди.

Алексей Мокринский Ханти-Мансийск автоном округидаги йирик ишлаб чиқариш корхоналарида, хусусан, нефть ва газ соҳаси ҳамда бошқа йўналишларда жами 20 мингдан зиёд бўш иш ўринлари мавжудлигини билдирди.

 Таъкидланишича, Ханти-Мансийск автоном округида ишлаётган Ўзбекистон фуқароларининг аксарияти патент расмийлаштирган ҳолда фаолият кўрсатаяпти. Эътиборлиси, иш берувчилар орасида ўзбекистонликларни ишга жалб қилиш бўйича талаб тобора ортиб бормоқда.

Бош консулхона ходимлари ўз навбатларида, Россия ва Ўзбекистон ўртасида юртдошларимизни ташкилий тарзда ишга жалб этишга оид имзоланган ҳукуматлараро ҳужжат талаблари, Миграция агентлиги ва хусусий ташкилотлар ўртасида эришилган келишувлар бўйича батафсил маълумот бердилар.

Учрашув якунида барча иш берувчиларга ҳамкорлик келишуви ва талабномаларни кўриб чиқиш учун тақдим этилди. Шунингдек, Ханти-Мансийск автоном округида йирик иш берувчи ташкилотлар раҳбари билан келгусида юртдошларимизни ташкиллаштирилган ҳолда ишга жойлаштириш тўғрисида келишувга эришилди.