АШХОБОД, 31 июль. /“Дунё” АА/. Ўзбекистон элчиси Равшанбек Алимов Туркманистон Вазирлар Маҳкамаси Раисининг ўринбосари Ботир Аннаев билан учрашди, деб хабар бермоқда “Дунё” АА мухбири.

Музокаралар чоғида томонлар транспорт, логистика ва коммуникация соҳаларидаги икки томонлама ҳамкорликнинг долзарб йўналишларини муҳокама қилдилар.

Икки мамлакат ўртасидаги савдо-иқтисодий ҳамкорликни кенгайтиришнинг энг муҳим омиллари сифатида замонавий транспорт инфратузилмасини янада ривожлантириш, халқаро транспорт коридорлари самарадорлигини ошириш ҳамда юк ташувчилар учун янада қулай шарт-шароитлар яратиш масалаларига алоҳида эътибор қаратилди.

Учрашув якунлари бўйича транспорт транзити, логистика ва коммуникация соҳаларида ўзаро манфаатли ҳамкорликни янада чуқурлаштириш, соҳавий идоралар ўртасидаги ҳамкорликни фаоллаштириш ҳамда қўшма ташаббусларни изчил илгари суриш бўйича келишувга эришилди.