VASHINGTON, 21-iyul. /“Dunyo” AA/. AQSH prezidenti Donald Tramp Kanadadan import qilinadigan ayrim mahsulotlarga qo‘shimcha 50 foizlik boj joriy etish haqidagi farmonni imzoladi, deb xabar bermoqda “Dunyo” AA muxbiri.

Oq uy maʼmuriyatining maʼlum qilishicha, ushbu qaror 1930-yilgi Tariflar to‘g‘risidagi qonunning 338-moddasi asosida qabul qilingan. Hujjatning asosiy maqsadi Kanada tomonidan Amerika mahsulotlariga nisbatan qo‘llanayotgan cheklovlarga javob qaytarish va AQSH ishlab chiqaruvchilari uchun adolatli raqobat muhitini taʼminlashdan iborat.

Yangi tariflar Kanadadan import qilinadigan qator mahsulotlarga, jumladan, vino, sport anjomlari, sement va boshqa tovarlarga tatbiq etiladi. Shu bilan birga, energetika mahsulotlari, kaliy o‘g‘itlari, muhim minerallar, baliq mahsulotlari hamda avvaldan boshqa tariflar amal qilayotgan ayrim tovarlar ushbu choralardan mustasno qilingan. Yangi tariflar farmon imzolanganidan 30 kun o‘tgach kuchga kiradi.

Oq uy maʼlumotiga ko‘ra, Kanada bir qator sohalarda AQSH mahsulotlariga nisbatan boshqa davlatlarga qaraganda qatʼiyroq cheklovlar qo‘llamoqda. Masalan, avtomobillar importiga belgilangan kvotalar amerikalik ishlab chiqaruvchilarni Kanada hududida ishlab chiqarishni kengaytirishga undayotgani taʼkidlangan. Shuningdek, 2025-yil aprelidan 2026-yil martigacha Kanadaga AQSHdan eksport qilingan avtomobillar hajmi o‘tgan yilning shu davriga nisbatan 22 foizga, yaʼni 5,6 milliard dollarga qisqargan.

Alkogolli ichimliklar bozorida ham shunga o‘xshash holat kuzatilgan. Kanadadagi aksariyat hududlarda AQSHda ishlab chiqarilgan alkogolli mahsulotlarni sotib olish va chakana savdosi to‘xtatilgan. Natijada, 2025-yil martidan 2026-yil fevraligacha Amerikadan eksport qilingan alkogolli ichimliklar hajmi 81 foizga, yaʼni 582 million dollarga kamaygan.

Sut mahsulotlari sohasida ham AQSH Kanada siyosatiga eʼtiroz bildirmoqda. Xususan, Kanada Amerika pishloqlari uchun belgilangan import kvotalarini Yevropa Ittifoqi davlatlariga nisbatan ancha cheklovchi tarzda belgilagani qayd etilmoqda.

Prezident Tramp maʼmuriyati taʼkidlashicha, yangi tariflar AQSH eksportchilariga yetkazilayotgan iqtisodiy zararni qoplash, mamlakat ishlab chiqaruvchilari manfaatlarini himoya qilish hamda savdoda o‘zaro teng shart-sharoitlarni taʼminlashga xizmat qiladi.

Tramp maʼmuriyatining “Amerika – birinchi o‘rinda” savdo siyosati mahalliy sanoatni qo‘llab-quvvatlash, yangi ish o‘rinlari yaratish va ishlab chiqarishni mamlakat ichiga qaytarishga qaratilgani taʼkidlanmoqda. Maʼlumotlarga ko‘ra, 2026-yil may va iyun oylarida AQSHda ishlab chiqarish sektori so‘nggi yillardagi eng yuqori o‘sish surʼatlarini qayd etgan.

AQSH rasmiylari fikricha, ko‘plab davlatlar Vashington bilan muzokaralar orqali savdo kelishuvlariga erishgan bo‘lsa, Kanada o‘z savdo cheklovlarini saqlab qolishni maʼqul ko‘rgan. Shu sababli, Amerika maʼmuriyati yangi tariflar ikki mamlakat o‘rtasidagi savdo munosabatlarida o‘zaro manfaat va adolat tamoyillarini tiklashga xizmat qiladi, deb hisoblamoqda.