TOKIO, 17-dekabr. /“Dunyo” AA/. Prezident Shavkat Mirziyoyevning Yaponiyaga rasmiy tashrifi arafasida kuniga 2,5 milliondan ortiq kishi harakatlanadigan Tokioning eng mashhur chorrahasida O‘zbekiston haqida maxsus videorolik namoyish etilmoqda, deb xabar bermoqda “Dunyo” AA muxbiri.

Eʼtiborlisi, ushbu monitor Yaponiyadagi eng yirik ekran bo‘lib, uning umumiy hajmi 424 kvadrat metrni tashkil etadi. Videorolikda O‘zbekistonning sayyohlik salohiyati, tabiiy go‘zalliklari, meʼmoriy yodgorliklari, iqtisodiyot va texnologiyalar sohasidagi yutuqlarini ifodalovchi kadrlar mavjud.

Eslatib o‘tamiz, 18-20-dekabr kunlari O‘zbekiston Prezidenti Shavkat Mirziyoyev Yaponiya Bosh vaziri Sanae Takaichining taklifiga binoan rasmiy tashrif bilan ushbu mamlakatda bo‘ladi hamda “Markaziy Osiyo+Yaponiya” muloqotining oliy darajadagi sammitida ishtirok etadi.

Shuningdek, tashrif doirasida Tokio shahrida Yaponiya Imperatori Naruxito, Bosh vaziri Sanae Takaichi, parlament rahbariyati, hukumat aʼzolari, siyosiy partiyalar vakillari, yetakchi universitetlar rektorlari bilan uchrashuv va muzokaralar o‘tkazilishi rejalashtirilgan.