TOSHKENT, 15-dekabr. / “Dunyo” AA/. 2025-yilning yanvar-oktyabr oylarida xorijga taʼlim olish uchun ketgan O‘zbekiston fuqarolari soni 26,4 ming kishini tashkil etdi, deb xabar qilmoqda “Dunyo” AA muxbiri.

Milliy statistika qo‘mitasi maʼlumotlariga ko‘ra, mazkur ko‘rsatgich o‘tgan yilning mos davriga nisbatan 6,1 ming nafarga yaʼni 19 foizga kamaygan.

Qayd etilishicha, o‘zbekistonliklar orasida MDH va Osiyo mamlakatlari eng mashhur hisoblanadi.

Yetakchi o‘rinlarda Rossiya (5863 kishi), Tojikiston (5761) va Qirg‘iziston (3835).

Shuningdek, ro‘yxatda Janubiy Koreya (3344), Turkiya (2256), Xitoy (1186), Qozog‘iston (1014), Buyuk Britaniya (839), Germaniya (366) va AQSH (318) bor.

Mutaxassislarning taʼkidlashicha, chet elda o‘qishga bo‘lgan talabning kamayishi xorijdagi taʼlim dasturlariga kiritilgan o‘zgarishlar, shuningdek, O‘zbekistonda ichki taʼlim salohiyatining kuchayishi bilan bog‘liq.