OSTONA, 1-iyun. /“Dunyo” AA/. O‘zbekiston Prezidentining Ostonaga tashrifi doirasida ikki mamlakat o‘rtasidagi savdo-iqtisodiy hamkorlikni rivojlantirishga qaratilgan “yo‘l xaritasi”ni imzolash marosimi bo‘lib o‘tdi, deb xabar beradi “Dunyo” AA muxbiri “Kazinform” xalqaro axborot agentligiga tayanib.

Agentlik maʼlumotiga ko‘ra, mazkur hujjatning imzolanishi Qozog‘iston Prezidentining 2025-yil 14-15-noyabr kunlari O‘zbekistonga davlat tashrifi chog‘ida erishilgan kelishuvlarning amaliy davomi bo‘ldi.

Yangi “yo‘l xaritasi” avtomobilsozlik, energetika, kimyo sanoati, metallurgiya, farmatsevtika, logistika, qurilish materiallari, uy-joy qurilishi, qishloq xo‘jaligi kabi tarmoqlarda qo‘shma loyihalarni amalga oshirishni ko‘zda tutadi.

Shuningdek, unda ilgari surilgan tashabbuslarning ro‘yobga chiqarilishi Qozog‘iston va O‘zbekiston o‘rtasidagi savdo-iqtisodiy sheriklikni yana-da mustahkamlashga hamda o‘zaro manfaatli hamkorlikni kengaytirishga xizmat qiladi.