DUShANBE, 18-oktabr. /“Dunyo” AA/.Tojikistonning So‘g‘d viloyati O‘zbek ma’naviyati va ma’rifat markazi rahbari o‘rinbosari, O‘zbekistonning “Do‘stlik” ordeni sohibi, jurnalist Ozod Meliboyev “Dunyo” AAga bergan intervyusida O‘zbekiston xalqini 21-oktabr – O‘zbek tili bayrami kuni bilan tabrikladi:

– Bugungi globallashuv sharoitida har birimiz ko‘plab jahon tillarini o‘rganamiz va ularda so‘zlashamiz. Bu tillar biz uchun muloqot vositasi bo‘lib xizmat qiladi. Shu bilan birga, biz foydalanadigan va gaplashadigan tillar orasida alohida o‘rin egallaydigan bitta til bor. Bu til shunchaki muloqot vositasi emas. U bizni milliy ma’naviyatimiz bilan bevosita bog‘laydi.

Aynan shu til milliy ma’naviyatimizning eng asosiy ustunlaridan biridir. Shubhasiz, bu bizning ona tilimizdir. Mavlono Jaloliddin Rumiy shunday degan edi: “Biz dengiz farzandimiz, bizga dengiz makon, qaytamiz ul bahrga, biz undanmiz har qachon. Bu jahon tuprog‘idan ko‘tarilgan bir bulut, yana o‘z asli tomon yog‘ar yomg‘ir, begumon”.

Ya’ni, tasavvur qiling shu daryodan ajralib chiqqan tomchi osmonga ko‘tariladi, u yerdan yomg‘ir bo‘lib yerga yog‘adi, daraxtlar va tuproqqa singidi hamda bir doirani bosib o‘tib, yana daryoga qaytadi.

Shu ma’noda, dunyoning turli burchaklarida yashayotgan biz – o‘zbeklar ham o‘zbek tili markazi bo‘lgan O‘zbekistondan uzilib qolishni istamaymiz. Milliy ma’naviyatimiz markazi bo‘lgan O‘zbekistonda sodir bo‘layotgan voqealar doimo e’tiborimiz markazida turibdi.

Men bugungi avlodimiz oldida juda muhim vazifa turganiga ishonaman. O‘zbekiston xalq shoiri Usmon Azimning so‘zlari bilan aytganda:“ Men aytdimki, sen qo‘shig‘imning mohiyatisan, men aytdimki, sen yuragimning o‘zagisan. Sen otamdan qolgan merosdirsan,sen farzandim oldidagi burchimsan”.

Ona tilimizni qorachiqdek asrab-avaylash va uni kelajak avlodlarga yetkazish mas’uliyati ham zimmamizdadir.

Ona tili haqida gap ketganda, O‘zbekiston Qahramoni, O‘zbekiston xalq shoiri Abdulla Oripov juda go‘zal tarzda shunday degan edi: “Ona tilim, sen bor ekansan, men, shubhasiz, bulbul sayrashini she’rga ko‘chiraman. Sen yo‘q bo‘lib ketgan kunda esa, men ham, shubhasiz, to‘tiqushga aylanib qolaman”.

Har birimizga o‘z ona tilimizda bulbul sayrashini tinglash nasib etsin va hech birimiz to‘tiqush holida qolmaylik.

Fursatdan foydalanib, barcha vatandoshlarimizni O‘zbek tili bayrami bilan chin qalbdan muborakbod etaman. Bayramingiz muborak bo‘lsin, aziz do‘stlar!