AKTOBЕ, 29-sentabr. /“Dunyo” AA/. O‘zbekistonning Oqtov shahridagi Bosh konsulxonasi diplomatlari Aqtobe viloyati hokimi o‘rinbosari G‘olimjon Yeleuov bilan uchrashuv o‘tkazdi, deb xabar bermoqda “Dunyo” AA muxbiri.

Muzokaralar chog‘ida ikki tomonlama hamkorlik, savdo-iqtisodiy aloqalar, turizm va madaniyat masalalari ko‘rib chiqildi.

Aqtobe viloyati hokimligi ma’lumotlariga ko‘ra, joriy yilning birinchi yarmida Aqtobe viloyati va O‘zbekiston hududlari o‘rtasidagi savdo-iqtisodiy ayirboshlash hajmi 25 million dollarni tashkil etdi. Shu bilan birga, ushbu ko‘rsatkichda ijobiy dinamika kuzatilayotgani qayd etildi.

Uchrashuvda O‘zbekistonga yuborilayotgan salmoqli hajmdagi yuklarning Aqtobe viloyati hududi orqali tranzit o‘tishi, ularning tezkor va xavfsiz harakatlanishini ta’minlash masalalari ham muhokama qilindi. 

Aqtobe viloyati hokimligi ikki tomonlama aloqalarni yanada rivojlantirishga ko‘maklashish va O‘zbekistondan kelgan tadbirkorlarga har tomonlama yordam ko‘rsatishga tayyorligini bildirdi. Shu munosabat bilan joriy yilning 8-9-oktabr kunlari Aqtobe viloyati tadbirkorlarining Toshkent shahriga tashrifini tashkil etish bo‘yicha kelishuvga erishildi.

Shuningdek, turizm sohasidagi hamkorlik faol rivojlanib borayotgani qayd etildi. Joriy yilning avgust oyidan boshlab Aqtobe–Toshkent yo‘nalishi bo‘yicha haftasiga ikkita aviaqatnov amalga oshirilayotgani va sayyohlar oqimi oshib borayotgani kuzatilmoqda.

Iyul oyida Oktov shahrida bo‘lib o‘tgan Hukumatlararo komissiya majlisi va mintaqalar rahbarlarining birinchi uchrashuvida erishilgan kelishuvlarni amaliy hayotga tatbiq etish doirasida Aqtobe shahridagi O‘zbekiston savdo uyining faoliyati muhokama qilindi. Ma’lumotlarga ko‘ra, Savdo uyi faoliyati doirasidagi savdo-iqtisodiy operatsiyalar hajmi hozirda 500 ming dollarni tashkil etgan.

Bosh konsulxona vakillari, shuningdek, Aqtobe viloyati “Atameken” tadbirkorlar palatasi rahbariyati va mahalliy ishbilarmonlar bilan ham uchrashuv o‘tkazdilar. Tadbirda oziq-ovqat sanoati, chorvachilik, ishlab chiqarish sohalarida faoliyat yurituvchi viloyatning 15 dan ortiq yirik korxonalari vakillari ishtirok etdi.

Qozog‘istonlik tadbirkorlar O‘zbekiston ishbilarmonlari bilan o‘zaro aloqalarni rivojlantirish va mustahkamlashdan manfaatdor ekanliklarini bildirdilar. Bundan tashqari, biznes vakillari o‘rtasida to‘g‘ridan to‘g‘ri aloqalarni soddalashtirish maqsadida Ishlab chiqaruvchilar yagona reyestrini tuzish taklif qilindi.

Tashrif doirasida Bosh konsulxona xodimlari Aqtobe viloyatida tadbirkorlik va o‘zbek mahsulotlari eksporti bilan shug‘ullanayotgan vatandoshlar bilan ham uchrashib, O‘zbekiston savdo uyi faoliyati bilan yaqindan tanishdilar.