SEUL, 3-oktabr. /“Dunyo” AA/. Janubiy Koreyaning nufuzli “The Korea Post” nashrida O‘zbekistonda AKT sohasida amalga oshirilayotgan ishlarga bag‘ishlangan maqola e’lon qilindi, deb xabar bermoqda “Dunyo” AA muxbiri.

Maqolada yozilishicha, so‘nggi yillarda O‘zbekiston global texnologik autsorsing bozorida asta-sekin o‘z o‘rnini egallab bormoqda.

Ushbu transformatsiya ko‘lami bozorning o‘z dinamikasida ham aks etadi. IT-autsorsing xizmatlari hajmi 2019-yildagi 3,2 million dollardan 2025-yilda 716,4 million dollarga o‘sdi. Ayni shu davrda IT-kompaniyalar soni 369 tadan 3400 taga ko‘paydi, ko‘rsatilgan xizmatlar hajmi esa 2,8 milliard dollarga yetdi.

Eng muhim o‘zgarish faqatgina bu raqamlar bilan cheklanmaydi. O‘zbekistonning xalqaro xizmatlar ko‘rsatish zanjiridagi roli ham o‘zgarib bormoqda. Chunki mamlakat asta-sekin texnologiya bilan bog‘liq alohida vazifalarni bajarishdan keng ko‘lamli korporativ funksiyalarni qabul qilishga o‘tmoqda.

Nashrda qayd etilishicha, O‘zbekistonning katta ustunligi uning yosh va salohiyatli kadrlar zaxirasidir. Mamlakat aholisi 38 milliondan ortiq bo‘lib, ularning qariyb 60 foizini 30 yoshgacha bo‘lgan yoshlar tashkil etadi.

Ayni paytda mamlakatda 500 mingga yaqin IT-mutaxassis faoliyat yuritmoqda, maxsus IT-universitetlar esa har yili 25 mingga yaqin yosh va malakali kadrlarni tayyorlab chiqarmoqda.

O‘zbekiston global autsorsing bozoriga kirish uchun zarur bo‘lgan qator shart-sharoitlarni yaratgan. Bu borada yosh iste’dodlar zaxirasi, o‘sib borayotgan IT sektori, kengayib borayotgan BPO va KPO segmentlari, xalqaro bozorlarga eksport va xorijiy kompaniyalar kirib kelishini qo‘llab-quvvatlash muhim ahamiyat kasb etadi.