MADRID, 21-sentabr. /“Dunyo” AA/. Arxeologlar Qashqadaryo viloyatining Qamashi tumanidagi Odirmon yodgorligida miloddan avvalgi III asrdan milodiy III asrgacha bo‘lgan davrga oid otashgoh va ossuariyni aniqladilar, deb xabar bermoqda “Dunyo” AA muxbiri Ispaniyaning “La Brújula Verde” raqamli jurnaliga tayanib.

Yodgorlikda muntazam tadqiqotlar joriy yilda Samarqand Arxeologiya instituti ilmiy xodimi Sanjar Abdurahimov rahbarligida boshlandi. Majmuaning shimoli-sharqiy qismida balandligi qariyb 70 santimetr va kengligi 90 santimetr bo‘lgan, bir necha qavat loy suvoq qoldiqlari bo‘lgan otashgoh topildi.

Uning yonida ossuariy — inson suyaklarini saqlashga mo‘ljallangan sopol idish ham topilgan. Uning yuzasi kiyik va archa — Turkiston archasi tasvirlari bilan bezatilgan bo‘lib, naqshlarning aniq ma’nosini mutaxassislar qayta tiklash ishlaridan so‘ng belgilaydilar.

Otashgoh va ossuariyning birgalikda topilishi zardushtiylik an’analari bilan bog‘liq dafn marosimlaridan dalolat berishi mumkin. Ushbu e’tiqodga ko‘ra, marhumlarning jasadlari ko‘milmagan va kuydirilmagan, suyaklar tozalangach, maxsus idishlarga joylashtirilgan.

Agar Odirmon yodgorligining davri tasdiqlansa, ushbu topilma So‘g‘d va Xorazmda bezakli ossuariylar keng tarqalishidan bir necha asr oldingi dafn marosimlarini qayd etish imkonini beradi. 

Arxeologlar Odirmonning vazifasi va majmuaning tarixiy maqomini aniqlashga yordam beradigan qazish ishlarini davom ettirmoqdalar. O‘zbekiston Madaniy meros agentligi ushbu topilmalar mintaqaning qadimgi aholisi diniy e’tiqodlari va dafn urf-odatlarini o‘rganishda qimmatli manba hisoblanishini qayd etmoqda.