OSTONA, 2-iyul. /“Dunyo” AA/. O‘zbekiston va Qozog‘iston hukumatlari davlat chegarasi rejimi to‘g‘risidagi bitimga o‘zgartish kiritish haqidagi protokolni Qozog‘iston tomoni ratifikatsiya qildi, deb xabar bermoqda “Dunyo” AA muxbiri “Kazinform” xalqaro axborot agentligi maʼlumotiga tayanib.

Hujjatga muvofiq, “Sirdaryo – Malik” va “Selinniy – Oq oltin” avtomobil o‘tish punktlari ikki tomonlama maqomdan xalqaro maqomga o‘tkaziladi. Shuningdek, mazkur punktlar kunduzgi ish rejimi o‘rniga kecha-kunduz faoliyat yuritadi.

Protokolga ko‘ra, har ikki o‘tish punktining faoliyat yo‘nalishi ham o‘zgaradi. Ular faqat yengil avtotransport vositalari harakati uchun mo‘ljallangan toifadan yuk va yo‘lovchi transport vositalari harakatiga xizmat ko‘rsatuvchi toifaga o‘tkaziladi.

“Selinniy – Oq oltin” o‘tish punkti orqali yengil avtomobillar, bo‘sh yuk avtomashinalari, shuningdek, yirik hajmli va og‘ir vaznli yuklar hamda tovarlarni tashishga ruxsat beriladi.

“Sirdaryo – Malik” o‘tish punkti orqali esa tijorat yuklari va tovarlarini o‘tkazish nazarda tutilmagan bo‘lib, faqat yengil avtomobillar hamda bo‘sh yuk avtomashinalari harakatlanishi mumkin bo‘ladi.

Taʼkidlanishicha, mazkur protokolning amaliy ijrosi Qozog‘iston–O‘zbekiston davlat chegarasidagi o‘tish punktlari infratuzilmasini modernizatsiya qilish, shuningdek, transport va yo‘lovchilar oqimini yana-da samarali taqsimlash imkonini beradi.