TOSHKENT, 19-may. /“Dunyo” AA/. 2026-yil 1-may holatiga ko‘ra, O‘zbekistonda xorijiy investitsiyalar ishtirokidagi 19 ming 490 ta korxona faoliyat yuritmoqda, deb xabar bermoqda “Dunyo” AA muxbiri.

Milliy statistika qo‘mitasi maʼlumotlariga ko‘ra, ularning 4 ming 427 tasi qo‘shma korxonalar, 15 ming 63 tasi esa to‘liq xorijiy kompaniyalardir.

So‘nggi besh yilda xorijiy kapital ishtirokidagi korxonalar soni 1,4 barobar ko‘paydi. Shu bilan birga, xorijiy korxonalarning ulushi 61,3 foizdan 77,3 foizga oshdi. Bu xorijiy biznesning mamlakat iqtisodiyotiga ishonchi ortib borayotganidan dalolat beradi.

Faoliyat ko‘rsatayotgan korxonalar soni bo‘yicha Xitoy yetakchilik qildi – 5 ming 615 ta kompaniya. Quyida xorijiy kapital ishtirokidagi korxonalar soni bo‘yicha yetakchi davlatlar keltirilgan:

-Rossiya – 3308,

-Turkiya – 2216,

-Qozog‘iston – 1259,

-Koreya Respublikasi – 721,

-Afg‘oniston – 656,

-Ozarbayjon – 452,

-Tojikiston – 437,

-BAA – 427,

-Hindiston – 405 ta.

Mutaxassislarning taʼkidlashicha, xorijiy kompaniyalar sonining barqaror o‘sishi ishbilarmonlik muhitini yaxshilash, iqtisodiyotni liberallashtirish va xalqaro investitsiyaviy hamkorlikni kengaytirish borasidagi izchil islohotlar bilan bog‘liq.