STOKGOLM, 15-oktabr. /“Dunyo” AA/. Shvetsiyaning “Hemisphere Technologies AB” kompaniyasi rahbariyati hamda O‘zbekiston Qishloq xo‘jaligi vazirligi va sohaviy tashkilotlar vakillari ishtirokida onlayn muzokara o‘tkazildi, deb xabar bermoqda “Dunyo” AA muxbiri.

Uchrashuvda Shvetsiya kompaniyasi bosh direktori Agnes Martelet tomonidan korxona faoliyati hamda noyob turdagi o‘simliklar urug‘ini kompleks qayta ishlashning zamonaviy texnologiyalari yuzasidan batafsil taqdimot qilindi. 2021-yilda tashkil etilgan mazkur kompaniya urug‘larni protein uni, moy va tolali mahsulotlarga qayta ishlab, xomashyodan to‘liq foydalanish imkonini beruvchi innovatsion usullarni qo‘llashi qayd etildi. Ushbu mahsulotlarning tarkibiy qismlari non va makaron mahsulotlari, sport oziq-ovqati, hayvonlar ozuqasi hamda kosmetika vositalarini ishlab chiqarishda keng foydalanilishi mumkinligi bildirildi.

O‘z navbatida, O‘zbekiston tomoni respublikada tolali ekinlarni yetishtirish va chuqur qayta ishlash sanoatini rivojlantirishdan manfaatdor ekanini bildirib, mahalliy tuproq-iqlim sharoitiga mos keladigan urug‘ bazasini shakllantirish muhimligini ta’kidladi. Muloqot chog‘ida texnologik tajriba almashish, ilmiy-tadqiqot tashkilotlari bilan hamkorlik qilish va ilk sinov loyihalarini amalga oshirish masalalari ko‘rib chiqildi.

Muzokaralar yakunida Shvetsiya tomoni sinov uchun mahsulot namunalarini taqdim etish hamda mamlakatimizda pilot loyihani ishlab chiqish tashabbusini bildirdi.