TOSHKENT, 6-iyul. /“Dunyo” AA/. Oliy Majlis Qonunchilik palatasi deputatlari Kelishuv komissiyasi tomonidan takomillashtirilgan “Toshkent xalqaro moliya markazi to‘g‘risida”gi konstitutsiyaviy qonun loyihasining yangilangan tahririni ko‘rib chiqdi, deb xabar bermoqda “Dunyo” AA muxbiri.

Qayd etilishicha, qonun loyihasi Toshkent xalqaro moliya markazining huquqiy maqomini, uning faoliyat tamoyillarini, boshqaruv tizimini, vakolatlarini va markaz hududida amal qiladigan maxsus huquqiy rejimni belgilaydi.

Hujjatga ko‘ra, markaz hududida O‘zbekiston Konstitutsiyasi, mazkur konstitutsiyaviy qonunga va Moliya markazining qarorlariga zid bo‘lmagan holda Angliya va Uels huquqining prinsiplari, qonunchiligi va sud pretsedentlari amal qilishiga oid qoidalar o‘z aksini topgan.

Shuningdek, markaz maʼmuriyati, Toshkent moliyaviy xizmatlar boshqarmasi va Toshkent xalqaro tijorat sudining huquqiy maqomi mustahkamlangan. Bundan tashqari, markaz hududida soliq va bojxona imtiyozlari joriy etilishi belgilangan.

Kelishuv komissiyasida kelishuvga erishilgani yakuniy bosqich hisoblanmaydi. “Qonunchilik palatasi to‘g‘risida”gi konstitutsiyaviy qonunga muvofiq, takomillashtirilgan hujjat quyi palata tomonidan odatiy tartibda qayta ko‘rib chiqiladi. Qonun qabul qilingan taqdirda maʼqullash uchun Senatga yuboriladi, shundan so‘ng Prezidentga imzolash uchun kiritiladi.

Hujjat ustida ishlar mart oyi oxirida, Prezident “Tashkent City” majmuasi hududida joylashadigan Toshkent xalqaro moliya markazini tashkil etish to‘g‘risida farmon chiqarganidan buyon olib borilmoqda.

2-iyun kuni Oliy Majlis Qonunchilik palatasi “Toshkent xalqaro moliya markazi to‘g‘risida”gi va “Enterprise Uzbekistan” brendi ostidagi “Raqamli texnologiyalar xalqaro markazi to‘g‘risida”gi ikkita konstitutsiyaviy qonun loyihasini ikkinchi va uchinchi o‘qishda qabul qilgan edi.

13-iyun kuni Senat o‘zining 16-yalpi majlisida “Toshkent xalqaro moliya markazi to‘g‘risida”gi ushbu konstitutsiyaviy qonunni takomillashtirish haqida qaror qabul qildi.