TOSHKЕNT, 8-iyun. /“Dunyo” AA/. 2026-yil 1-yanvar holatiga ko‘ra, O‘zbekiston aholisining o‘rtacha yoshi 29,5 yoshni tashkil etdi, deb xabar bermoqda “Dunyo” AA muxbiri.

Milliy statistika qo‘mitasi ma’lumotlariga ko‘ra, aholining eng yuqori o‘rtacha yoshi Toshkent shahrida qayd etilgan — 32,7 yosh. Keyingi o‘rinlardan Buxoro viloyati — 31,1 yosh, Toshkent viloyati — 31 yosh va Navoiy viloyati — 30,1 yosh joy olgan.

Aholining o‘rtacha yoshi Farg‘ona viloyatida 30 yoshni, Qoraqalpog‘iston Respublikasida esa 29,8 yoshni tashkil etdi. Andijon va Xorazm viloyatlarida ushbu ko‘rsatkich 29,5 yoshga, Namangan viloyatida esa 29 yoshga yetdi.

Mamlakat bo‘yicha o‘rtacha ko‘rsatkichdan pastroq raqamlar Sirdaryo viloyatida — 28,7 yosh, Samarqand viloyatida — 28,5 yosh va Jizzax viloyatida — 28,4 yosh sifatida qayd etildi.

Eng yosh aholi Qashqadaryo viloyatida — 27,7 yosh va Surxondaryo viloyatida — 27,4 yosh bo‘lib ro‘yxatga olingan.

Statistika ma’lumotlari O‘zbekiston aholisining yosh tarkibi nisbatan yosh ekanligini ko‘rsatadi. Bunda eng yuqori o‘rtacha yosh poytaxtda va mamlakatning qator hududlarida kuzatilgan bo‘lsa, eng yosh ko‘rsatkichlar janubiy viloyatlarda qayd etilgan.

8 iyun holatiga ko‘ra, O‘zbekistonning doimiy aholisi soni 38 million 496 ming 805 kishini tashkil etmoqda.