TOKIO, 15-noyabr. /“Dunyo” AA/. Yaponiyaning “Belluna Co., Ltd.” kompaniyasi Toshkent viloyatida to‘rt yulduzli mehmonxonalar qurish, shuningdek, mahalliy mahsulotlar eksport va to‘qimachilik ishlab chiqarish sohalarida hamkorlikni rivojlantirishni ko‘rib chiqmoqda, deb xabar bermoqda “Dunyo” AA muxbiri.

Ushbu loyihalarni amalga oshirish istiqbollari Toshkent viloyati hokimi Zoyir Mirzayev boshchiligidagi delegatsiyaning Yaponiyaga amaliy tashrifi doirasida O‘zbekistonning Tokiodagi elchixonasida “Belluna” prezidenti Kiyosi Yasuno bilan bo‘lib o‘tgan uchrashuvda muhokama qilindi.

Muzokaralarning asosiy yo‘nalishlaridan biri mehmonxona biznesini rivojlantirish va mintaqaning sayyohlik infratuzilmasiga yapon investitsiyalarini jalb qilishdan iborat bo‘ldi. Mehmonxonalar qurish uchun mumkin bo‘lgan joylar sifatida Bo‘stonliq tumanidagi Chorvoq dam olish zonasi va Toshkent shahri yaqinidagi hududlar ko‘rib chiqilmoqda.

Tomonlar yer uchastkalarini ajratish, obyektlarni muhandislik-kommunikatsiya tarmoqlariga ulash va amaldagi investitsiya imtiyozlaridan foydalanish shartlarini muhokama qildilar.

Hamkorlikning yana bir yo‘nalishi Toshkent viloyati ishlab chiqaruvchilari mahsulotlarini “Belluna” savdo kataloglari va onlayn-platformalari orqali Yaponiya bozoriga olib chiqish bo‘lishi mumkin. Gap paxta matosidan tayyorlangan kiyimlar, uy-joy to‘qimachiligi, quritilgan mevalar, yong‘oqlar va tabiiy kosmetika haqida bormoqda.

Bosqichma-bosqich amalga oshirish jarayonida dastlabki bosqichda 10–15 ta mahalliy eksportyor korxonani hamkorlikka jalb qilish rejalashtirilgan. Ularning mahsulotlarini yapon tomoniga taqdim etish hamda sifat va markalash bo‘yicha Yaponiya bozori talablariga moslashtirish ko‘zda tutilgan.

Toshkent viloyati hokimiyati istiqbolli investitsiya tashabbuslarini amalga oshirishga, jumladan, infratuzilma, kadrlar tayyorlash va yapon hamkorlari hamda mahalliy ishlab chiqaruvchilar va eksportyorlar o‘rtasida to‘g‘ridan-to‘g‘ri aloqalarni o‘rnatish masalalarida har tomonlama ko‘mak berishga tayyorligini bildirdi.

Uchrashuv yakunida tomonlar muhokama qilingan yo‘nalishlar bo‘yicha ishlarni davom ettirish va taklif etilgan tashabbuslarni amaliy tarzda ko‘rib chiqishga kelishib oldilar.