O‘SMAT, 4-oktyabr. /«Dunyo» AA/. Jizzax viloyatining Baxmal tumanida «BMB ZA’FARON» plantatsiyasi maydonlariga yangi za’faron ekish boshlandi, deb xabar bermoqda «Dunyo» AA muxbiri.

Plantatsiya maydoni 820 gektardan 900 gektarga yetkaziladi. Loyiha dorivor o‘simliklar yetishtirishni kengaytirish vazifalari doirasida amalga oshirilmoqda va 2027 yilga borib viloyatda za’faron plantatsiyalari maydonini 2 ming gektarga yetkazishni nazarda tutadi.

So‘nggi ikki yil davomida yangi maydonlarga mahalliy plantatsiyalarda yetishtirilgan za’faron piyozlari ekilmoqda. Bu import qilinadigan ekinlarga bo‘lgan talabni bosqichma-bosqich kamaytirish imkonini bermoqda.

Loyiha negizida za’faronni quritish, qayta ishlash va qadoqlash uskunalariga ega zamonaviy ishlab chiqarish majmuasi barpo etildi. «ORO ROSSO Milano» brendi ostidagi 20 dan ortiq turdagi mahsulot Italiya, Avstriya, Niderlandiya, Fransiya, AQSH, Tojikiston, Saudiya Arabistoni va boshqa davlatlarga eksport qilinmoqda.

2025-yilda eksport hajmi 10,2 million yevroni tashkil etdi. Joriy yilda bu ko‘rsatkichni 12 million yevroga yetkazish rejalashtirilgan.

Loyiha ish o‘rinlarini yaratishga ham xizmat qilmoqda. 30 mingga yaqin aholi mavsumiy ishlarga jalb qilingan bo‘lsa, 500 nafardan ortiq kishi doimiy ish bilan ta’minlangan.

Ishlab chiqarishni kengaytirish va o‘z xomashyo bazasini shakllantirish o‘zbek za’faroni eksportini yanada ko‘paytirish va uning xalqaro bozorlardagi o‘rnini mustahkamlash uchun mustahkam zamin yaratadi.