TOSHKENT, 21-oktabr. /“Dunyo” AA/. 21-oktabr – O‘zbek tili bayrami kuni munosabati bilan poytaxtimizdagi Adiblar xiyobonida tantanali ma’naviy-ma'rifiy tadbir bo‘lib o‘tdi, deb xabar bermoqda “Dunyo” AA muxbiri.

Unda davlat va jamoat tashkilotlari, vazirlik va idoralar hamda keng jamoatchilik vakillari, jumladan, O‘zbekiston Tashqi ishlar vazirligi xodimlari ishtirok etdi.

Marosim davomida buyuk shoir va mutafakkir, o‘zbek adabiy tili va adabiyoti rivojiga beqiyos hissa qo‘shgan Alisher Navoiy haykali poyiga gulchambarlar qo‘yildi. Ulug‘ bobokalonimizning boy adabiy merosi, uning ona tilimiz ravnaqi va milliy ma’naviyatimiz yuksalishidagi o‘rni alohida e’tirof etildi.

Tadbirda o‘zbek tilining milliy o‘zligimiz, tariximiz va madaniyatimizning ajralmas qismi ekani ta’kidlandi. Ona tilimizni asrab-avaylash, uning boy imkoniyatlaridan samarali foydalanish va xalqaro miqyosdagi nufuzini yana-da oshirish muhimligi qayd etildi.

“Dunyo” AA olgan suratlar