DUBAY, 5-iyul. /“Dunyo” AA/. BAAda faoliyat yuritayotgan o‘zbekistonlik tadbirkor Ulug‘bekxon Maksumov tomonidan yurtimizdagi bir qator texnikumlarga zamonaviy o‘quv-amaliy jihozlari homiylik asosida taqdim etildi, deb xabar bermoqda “Dunyo” AA muxbiri.

Mazkur tashabbus Dubay shahridagi Bosh konsulxona ko‘magida amalga oshirilib, dastlab O‘zbekistondagi ta’lim muassasalarining moddiy-texnik holati va ehtiyojlari o‘rganildi.

Shu asosda “INKAS” kompaniyasi tomonidan jami 20 dona kompyuter, 10 dona printer, 5 dona tikuv mashinasi hamda 5 dona nuqtali payvandlash apparati homiylik tariqasida ajratildi.

Samarqand viloyati Kattaqo‘rg‘on tumanidagi 1- va 2-son texnikumlarga har biri uchun 10 tadan kompyuter va 5 tadan printer, Buxoro viloyati Vobkent tumanidagi 1-son texnikumiga esa 5 dona tikuv mashinasi hamda 5 dona nuqtali payvandlash apparati taqdim etildi.

Tashkilotchilarga ko‘ra, bu kabi tashabbuslar texnikumlarning moddiy-texnik bazasini mustahkamlash, o‘quvchilarning amaliy kasbiy tayyorgarligini oshirish, yoshlarni zamonaviy kasblarga yo‘naltirish va ularning mehnat bozoridagi raqobatbardoshligini yuksaltirishga xizmat qiladi.