PEKIN, 26-iyul. /“Dunyo” AA/. Shanxay hamkorlik tashkiloti Kotibiyati binosida “O‘zbekistonning dinamik taraqqiyoti” mavzusida taqdimot va ko‘rgazma o‘tkazildi, deb xabar bermoqda “Dunyo” AA muxbiri.

Tadbir O‘zbekiston elchixonasi, “Taraqqiyot strategiyasi” markazi va SHHT Kotibiyati bilan hamkorlikda tashkil etildi.

Anjumanda SHHT rahbariyati, tashkilot tarkibiga kiruvchi mamlakatlar elchilari, Xitoyning ishbilarmon va jamoatchilik-madaniy doiralari hamda OAV vakillari ishtirok etdilar.

Tadbir qatnashchilari e’tiboriga yangilangan “O‘zbekiston-2030” strategiyasining keng taqdimoti hamda mamlakatimizning boy tarixi, madaniyati va zamonaviy taraqqiyotini aks ettiruvchi 100 dan ortiq video va fotoasarlar havola etildi.

Tashkilot bosh kotibi Nurlan Yermekbayev Prezident Shavkat Mirziyoyevning oqilona rahbarligi ostida O‘zbekistonda jamiyat va davlat hayotining sifat jihatidan barcha sohalarida keng ko‘lamli islohotlar amalga oshirilayotganini ta’kidladi.

— Bu yil Shanxay hamkorlik tashkiloti tashkil topganining 25-yilligi ham nishonlanmoqda va O‘zbekiston tashkilotni rivojlantirishga salmoqli hissa qo‘shmoqda, — dedi bosh kotib. — SHHTning 2022-yildagi Samarqand sammiti Tashkilot doirasidagi ko‘p qirrali hamkorlikning yangi qiyofasini belgilab bergan muhim voqea bo‘ldi. O‘zbekiston SHHTdagi hamkorlikning barcha yo‘nalishlari — siyosiy, iqtisodiy va madaniy-gumanitar sohalarni muvozanatli rivojlantirish tarafdori bo‘lib, transport yo‘laklarini rivojlantirish, raqamlashtirish va tarmoqlararo kooperatsiyaga alohida e’tibor qaratmoqda.

“Taraqqiyot strategiyasi” markazi ijrochi direktori Eldor Tulyakov Yangi O‘zbekistonning iqtisodiy transformatsiyasi tarkibiy xususiyatga ega ekanini qayd etdi.

— Yangi O‘zbekiston yanada ochiq, raqobatbardosh va o‘zaro bog‘liq iqtisodiyotni barpo etmoqda. Hamkorlar uchun O‘zbekistonni shunchaki rivojlanayotgan bozor sifatida emas, balki strategik sherik va uzoq muddatli hamkorlik uchun mintaqaviy platforma sifatida ko‘rib chiqish lozim, — dedi u.

Tadbir mehmonlari e’tiboriga, shuningdek, hunarmandchilik kashtachilik va sopol buyumlari namunalari taqdim etildi. Mehmonlar o‘zbek milliy taomlaridan bahramand bo‘lish imkoniga ham ega bo‘ldilar.