TOSHKENT, 7-avgust. /“Dunyo” AA/. O‘zbekiston, Tojikiston, Ozarbayjon, Gruziya, Qozog‘iston, Qirg‘iziston, Pokiston, Turkmaniston va Ukraina bojxona idoralari vakillari o‘rtasida mintaqalararo uchrashuv bo‘lib o‘tdi, deb xabar bermoqda “Dunyo” AA muxbiri Tojikistonning “Xovar” milliy axborot agentligiga tayanib.

Agentlikda yozilishicha, mazkur uchrashuv Yo‘lovchi va yuk tashishni nazorat qilish dasturi doirasida tashkil etildi. Tadbirda mazkur dasturni amalga oshirish yakunlari sarhisob qilinib, hamkorlikning kelgusi yo‘nalishlari ko‘rib chiqildi.

Ishtirokchilar transmilliy uyushgan jinoyatchilikka qarshi kurashishda o‘zaro hamkorlikni mustahkamlash, dasturni amalga oshirish bo‘yicha ilg‘or tajriba almashish, bojxona siyosati sohasida strategik ustuvor yo‘nalishlarni belgilash hamda tavsiyalar ishlab chiqish xususida fikr almashdi.

Shuningdek, milliy maqsadli tahlil markazlari orqali hamkorlikni rivojlantirish, axborot almashinuvini takomillashtirish va qo‘shma operatsiyalarni muvofiqlashtirish bo‘yicha amaliy chora-tadbirlar muhokama qilindi.

Butunjahon bojxona tashkiloti tomonidan tashkil etilgan alohida sessiyada ushbu tuzilmaning Yo‘lovchi va yuk tashishni nazorat qilish dasturi hamkorlari hamda jahon bojxona hamjamiyati o‘rtasidagi muloqotni mustahkamlashdagi o‘rni ko‘rib chiqildi.

Bundan tashqari, tahliliy axborot almashish, operatsiyalarni muvofiqlashtirish, kadrlar salohiyatini oshirish va xalqaro huquqni muhofaza qilish operatsiyalarida ishtirok etish uchun Butunjahon bojxona tashkiloti vositalari va platformalaridan kengroq foydalanish imkoniyatlari muhokama qilindi.

Uchrashuv dasturi O‘zbekiston Davlat bojxona qo‘mitasiga tashrif bilan yakunlandi. Ishtirokchilar Markaziy bojxona laboratoriyasi, Bojxona rasmiylashtiruvi markazi va Milliy maqsadli tahlil markazi faoliyati bilan tanishdi.