INCHXON, 26-avgust. /“Dunyo” AA/. Inchxon shahri meri Pak Chon De mamlakatimiz mustaqilligining 35 yilligi arafasida “Dunyo” AA orqali yurtdoshlarimizga o‘zining samimiy tabrigi va ezgu tilaklarini yo‘lladi.

– Inchxon shahri va shaxsan o‘z nomimdan O‘zbekiston xalqini mustaqillikning 35 yilligi bilan samimiy muborakbod etaman.

Istiqlol yillarida O‘zbekiston katta va muhim taraqqiyot yo‘lini bosib o‘tdi. Bugun mamlakat iqtisodiyotini izchil mustahkamlab, xalqaro aloqalarini kengaytirib, fuqarolari uchun yangi imkoniyatlar yaratib borayotgan zamonaviy diyorga aylandi. O‘zbekistonning yutuqlari xalqaro hamjamiyatda yuksak hurmat va qiziqish uyg‘otmoqda.

Biz uchun O‘zbekiston Markaziy Osiyodagi yaqin insoniy munosabatlar, o‘zaro hurmat va ko‘p yillik hamkorlik bog‘lab turgan do‘st davlatdir.

Shaharlarimiz o‘rtasidagi aloqalar biz uchun alohida ahamiyatga ega. Inchxon Koreya Respublikasini dunyoning boshqa davlatlari bilan bog‘lab turuvchi xalqaro shahardir. Bizning portimiz va xalqaro aeroportimiz orqali millionlab odamlar, yuklar va g‘oyalar harakatlanadi. Biz ushbu imkoniyatlar Inchxon va O‘zbekiston o‘rtasidagi aloqalarni yanada mustahkamlashga xizmat qilishini istaymiz.

Bugun mamlakatlarimiz o‘rtasida savdo-iqtisodiy aloqalar, investitsiyaviy hamkorlik, taʼlim, madaniyat, turizm va zamonaviy texnologiyalar sohalaridagi munosabatlar jadal rivojlanmoqda. Mamlakatlarimizdan tobora ko‘proq insonlar bir-biri bilan tanishib, birga ishlamoqda va tahsil olmoqda. Fikrimcha, aynan shunday bevosita insonlararo aloqalar davlatlar o‘rtasidagi munosabatlarni mustahkamlaydi.

O‘zbekiston bilan amaliy hamkorlikni yanada rivojlantirishga tayyormiz. Logistika, shahar infratuzilmasi, raqamli texnologiyalar, taʼlim, innovatsiyalar va madaniyat sohalarida qo‘shma loyihalarni amalga oshirish uchun yaxshi imkoniyatlar mavjud.

O‘zbekiston ulkan salohiyat, yosh va iqtidorli avlodga ega bo‘lib, Markaziy Osiyoda muhim o‘rin tutadi. O‘z navbatida, Janubiy Koreya o‘z tajribasi bilan o‘rtoqlashish va o‘zbek hamkorlar bilan birgalikda taraqqiyot uchun yangi imkoniyatlarni izlashga tayyor.

Mamlakatlarimiz o‘rtasidagi munosabatlar bundan keyin ham mustahkamlanib, xalqlarimiz o‘rtasidagi do‘stlik yanada rivojlanishiga ishonaman.

Inchxon va O‘zbekiston shaharlari o‘rtasidagi do‘stlik aloqalari yanada mustahkamlansin.