TERMIZ, 21-may. /"Dunyo" AA/. BMT Taraqqiyot dasturining O'zbekistondagi doimiy vakili Akiko Fujii "Dunyo" AA uchun intervyusida 19-21-may kunlari Termiz shahrida bo'lib o'tayotgan Markaziy va Janubiy Osiyo o'rtasidagi bog'liqlik bo'yicha Termiz muloqotining birinchi yig'ilishining ahamiyati haqida fikrlarini bildirdi.

– O'zbekiston hukumatining Markaziy va Janubiy Osiyo bo'yicha birinchi Termiz muloqotini tashkil etish tashabbusini yuqori baholayman. Forum ushbu mintaqalar o'rtasidagi munosabatlarni rivojlantirishning eng muhim elementlari bo'lgan tinchlik, farovonlik, do'stlik va o'zaro aloqalarni mustahkamlash kabi muhim mavzularga bag'ishlangan.

Rivojlanish, tinchlik o'rnatish, insonparvarlik yordami va iqlim o'zgarishiga javob berish sohasidagi sa'y-harakatlarni birlashtirish nuqtai nazaridan ushbu muloqot alohida ahamiyatga ega. Markaziy va Janubiy Osiyo mintaqalar farovonligining asosi bo'lgan boy tabiiy resurslarga ega. Ushbu manbalar bizni bir-birimiz bilan bog'laydi. Biroq, iqlim o'zgarishi ushbu resurslar uchun raqobatni kuchaytirishi mumkin, shuning uchun ko'p tomonlama hamkorlar, jumladan, BMT va BMT TD kabi xalqaro tashkilotlar uchun hukumatlar bilan shu kabi platformalarda hamkorlik qilish ayniqsa muhimdir.

Bunday hamkorlik mintaqaning, ayniqsa, yosh avlodning yanada farovon kelajagini barpo etishda juda muhim, deb o'ylayman. Ushbu muloqotda yoshlar ham faol ishtirok etishiga chin dildan umid qilaman.

Ishonchim komilki, barqaror hamkorlik va jamoaviy harakatlar mintaqaning kelajakdagi gullab-yashnashining kalitidir. O'ylaymanki, bunday muloqotlar konstruktiv va hamkorlikka asoslangan hamkorlikni ilhomlantiradi va rag'batlantiradi.