KVETTA, 11-iyul. /"Dunyo" AA/. Pokiston hukumati janubi-g'arbiy Balujiston viloyatida avtobuslarga uyushtirilgan qator hujumlar chog'ida qurolli shaxslar tomonidan o'g'irlab ketilgan to'qqiz nafar yo'lovchining jasadini topdi, deb xabar bermoqda "Dunyo" AA muxbiri.

Pokistonning "The News International" nashri ma'lumotiga ko'ra, yo'lovchilar 10-iyun kuni kechqurun ikkita avtobusdan o'g'irlab ketilgan edi. Ularning jasadlari o'q jarohatlari bilan tog'lar orasidan topilgan.

"Biz jasadlarning shaxsini aniqlayapmiz va ularning oilalari bilan bog'lanyapmiz", – dedi mahalliy rasmiy.

Qayd etilishicha, sharqiy Panjob provinsiyasidan kelgan odamlarni o'ldirishda balujistonlik separatistlar ko'p marotaba ishtirok etgan. Ular hukumatni boshqa hududlardagi xarajatlarni moliyalash uchun mintaqaviy resurslarni o'g'irlashda ayblamoqda.

"So'nggi oylarda separatistlar Pokiston harbiylariga qarshi hujumlarni kuchaytirdi", – deyiladi bayonotda.

Eslatib o'tamiz, mart oyida Beluj ozodlik armiyasi (BLA) temir yo'lni portlatib yubordi va 400 dan ortiq poyezd yo'lovchilarini garovga oldi. Ulardan 31 nafari halok bo'ldi.

Balujiston Bosh vaziri Mir Sarfaraz Bugti tinch aholining shafqatsizlarcha o'ldirilishini qoralab, buni "ochiq terrorizm" deb atadi. "Biz bor kuchimizni safarbar etib, barcha terrorchilik tarmoqlarini tor-mor etamiz", – dedi u.

Pokiston Bosh vaziri Shahboz Sharif ham ushbu xunrezlikni qoraladi. "Biz terrorchilarga qarshi bor kuchimiz bilan kurashamiz", – deyiladi hukumat idorasi bayonotida.