DEHLI, 18-dekabr. /“Dunyo” AA/. O‘zbekiston delegatsiyasi Jahon sog‘liqni saqlash tashkilotining (JSST) Hindiston poytaxtida o‘z ishini boshlagan Anʼanaviy tibbiyot bo‘yicha ikkinchi Global sammitida ishtirok etmoqda, deb xabar bermoqda “Dunyo” AA muxbiri.

Missiya tarkibidan O‘zbekistonning Dehlidagi elchixonasi diplomatlari hamda mamlakatimizning yetakchi farmatsevtika va tibbiyot kompaniyalari vakillari o‘rin oldi.

JSST tomonidan Hindistonning AYUSH vazirligi bilan hamkorlikda tashkil etilgan ushbu forum xalq tabobatining ko‘p asrlik tajribasini zamonaviy sog‘liqni saqlash standartlariga integratsiya qilishni muhokama qilish uchun muhim maydon bo‘ldi.

Tadbir sessiyalari doirasida ekspertlar hamjamiyati xalq tabobati uchun dalillarga asoslangan bazani rivojlantirish, fitopreparatlarning xavfsizligi va yuqori sifatini taʼminlash, bioxilma-xillik va intellektual mulkni himoya qilish va boshqa fundamental yo‘nalishlarga eʼtibor qaratmoqda.

O‘zbekiston vakillari Hindiston bilan ikki tomonlama sheriklikni chuqurlashtirishga alohida urg‘u berdi. Sammit doirasida delegatsiya AYUSH vazirligi rahbariyati va soha tahliliy markazlari bilan qator muzokaralar o‘tkazdi.

Muloqotlar yakunlari bo‘yicha mutaxassislarni tayyorlashning qo‘shma dasturlari, mahsulotlar sifatini nazorat qilish jarayonlarini takomillashtirish, tibbiy xizmatlar va reabilitatsiya sohasidagi hamkorlikni faollashtirish bo‘yicha kelishuvlarga erishildi.

Xalqaro hamkorlarning O‘zbekiston xususiy sektoriga bo‘lgan qiziqishi mahalliy biznesning yuqori eksport va investitsiyaviy salohiyatini yana bir bor tasdiqladi.

Uchrashuvlar natijalari ilg‘or xalqaro, jumladan, Hindiston tajribasini joriy etish yo‘nalishi qatʼiy ekanligini ko‘rsatdi. Bu esa milliy sog‘liqni saqlash tizimini mustahkamlash va aholining xavfsiz sog‘lomlashtirish usullaridan foydalanish imkoniyatlarini kengaytirishga xizmat qiladi.

O‘zbekiston delegatsiyasining sammitdagi ishtiroki xalqaro muloqotni mustahkamlash va anʼanaviy tibbiyot sohasidagi amaliy hamkorlikni rivojlantirishda muhim qadam bo‘ldi.