QOHIRA, 24-iyul. /"Dunyo" AA/. Misrlik taniqli yozuvchi va ekspert Ahmad Abdu Tarabek  "Dunyo" AA uchun intervyusida O'zbekiston Prezidenti Shavkat Mirziyoyev tomonidan mamlakatimizda amalga oshirilayotgan islohotlarning samarali natijalari haqidagi fikrlarini bildirdi:

– Bugun men O'zbekiston xalqiga mamlakat boshdan kechirayotgan buyuk yuksalish davri haqida murojaat qilishdan mamnunman. O'zbekistonning mustaqil taraqqiyot yo'lini bir necha yildan beri kuzatib borayotgan inson sifatida aytishim mumkinki, respublika so'nggi yillarda, ayniqsa Shavkat Mirziyoyev Prezident etib saylanganidan beri katta yuksalishga erishdi.

O'zbekiston rahbari tashqi siyosatda keng ko'lamli yangilanishlarni amalga oshirdi, xalqaro munosabatlarni takomillashtirish yo'lida katta qadam tashladi.

Mamlakatning yangi tashqi siyosatida Markaziy Osiyo mamlakatlari bilan yaqin qo'shnichilik munosabatlarini shakllantirish asosiy yo'nalish sifatida belgilandi. Prezident Shavkat Mirziyoyev Markaziy Osiyo xalqlari o'rtasidagi hamkorlikka to'sqinlik qilayotgan barcha muammolarni bartaraf eta oldi. O'zbekiston mintaqadagi qolgan to'rt davlat bilan chegaradosh yagona mamlakat hisoblanadi.

O'zbekiston rahbarining tashabbusi bilan Markaziy Osiyo davlatlari rahbarlarining muntazam uchrashuvlari o'tkazilib, bu mintaqaga sarmoya markazi sifatida dunyoning qiziqishini oshirdi.

Jahonning yetakchi davlatlari Markaziy Osiyo mintaqasi bilan faol hamkorlik qilishga intila boshladi. "Markaziy Osiyo+" formatlari Yevropa Ittifoqi, AQSh, Yaponiya, Xitoy, Rossiya, Hindiston, Janubiy Koreya va boshqa tuzilmalar va davlatlar bilan shakllangan.

Ko'p tomonlama hamkorlik natijasida mintaqaga katta hajmda investitsiyalar kirib keldi. O'zbekiston bu jarayonda yetakchilik qilmoqda. Bu iqtisodiy yuksalish ijtimoiy sohalarda ham aks etdi. Rivojlanish ikki yo'nalishda, ya'ni vertikal — zamonaviy texnologiyalar va doimiy modernizatsiya asosida hamda gorizontal – butun mamlakat hududlarini qamrab oluvchi shaklda davom etmoqda. Bu O'zbekiston taraqqiyot yo'lining muhim jihatidir.

O'zbekiston Prezidenti mintaqada tinchlik va barqarorlikni ta'minlashga, ayniqsa, Afg'oniston muammosiga alohida e'tibor qaratmoqda. U bu mamlakatda tinchlik o'rnatish uchun hamma narsani qildi. "Afg'onistonda tinchlik – O'zbekistonda tinchlik" tamoyili asosida Afg'onistonda barqarorlikni ta'minlashga qaratilgan anjuman va sammitlar tashkil etildi.

Ko'plab xalqaro tashabbuslar, jumladan, Orolbo'yi mintaqasini ekologik innovatsiyalar va texnologiyalar hududiga aylantirish (tashabbus BMT platformasida taqdim etilgan) ilgari surildi.

Yana bir yirik tashabbus Markaziy va Janubiy Osiyo o'rtasidagi aloqalarni mustahkamlash ham aloqalarni o'rnatish va rivojlantirishga qaratilgan. Xivada YUNESKO ko'magida mintaqaning sivilizatsiyalar chorrahasi sifatidagi ahamiyatini ta'kidlagan xalqaro forum bo'lib o'tdi. Bu O'zbekistonga sayyohlik yo'nalishi sifatida qiziqishning ortishiga sabab bo'ldi.

Men bu yutuqlarni yaqinda chop etiladigan "Shavkat Mirziyoyev – Yangi O'zbekiston bunyodkori" nomli kitobimda batafsil bayon qilganman. Ushbu tajribani arab xalqlariga yetkazish niyatidaman. Umid qilamanki, bu kitob boshqa tillarga ham tarjima qilinadi.

Misr va O'zbekiston o'rtasidagi tarixiy aloqalar haqida ham to'xtalmoqchiman. "Misrdagi o'zbeklar tarixi" nomli kitobimda o'zbekistonlik sarkardalar va taniqli olimlar Misrga kelgani, jumladan, Ahmad ibn Tulun, al-Farg'oniy va Sayfiddin Qutuz haqida yozdim. Jumladan, Ahmad ibn Tulun Qohira shahri markazida hozirgacha mavjud bo'lgan mashhur masjidni qurgan. Ahmad al-Farg'oniy Nil sathini o'lchovchi qurilma yaratdi. Xorazm zaminidan kelgan sulton Qutuz esa mo'g'ullarning xavfini bartaraf etib, butun Misr xalqini muqarrar qirg'indan saqlab qoldi.

Misrda hozirgacha "O'zbekiya" nomi bilan ataluvchi mahalla mavjud bo'lib, u chuqur tarixiy aloqalarimizning guvohidir.