ISLOMOBOD, 12-iyun. /"Dunyo" AA/. "Umumiy kelajakka jamiyati" tahlil markazi ijrochi direktori Xolid Taymur Akram (Pokiston) "Dunyo" AA uchun intervyusida Bolgariya Prezidenti Rumen Radevning O'zbekistonga amalga oshirgan tashrif haqidagi fikrlarini bildirdi:

– Men uchun Bolgariya Prezidenti Rumen Radevning O'zbekistonga tashrifi Markaziy Osiyo va Sharqiy Yevropa o'rtasidagi aloqalarni mustahkamlash istagini ko'rsatuvchi muhim voqeadir.

Avvalo, amaliy hamkorlikka alohida e'tibor qaratilganini yuksak qadrlayman. Tovar ayirboshlash hajmini oshirish, turli mahsulotlar yetkazib berishni kengaytirish, shuningdek, poytaxtlarda savdo uylari ochish, imtiyozli kredit liniyalari ajratish to'g'risidagi qarorlar juda aniq qadamlardir.

Agrosanoat majmuasi, farmatsevtika, geologiya, sun'iy intellekt, raqamli texnologiyalar va turizm kabi istiqbolli yo'nalishlarda qo'shma loyihalarga alohida e'tibor qaratilayotgani yetakchilarning uzoqni ko'ra bilishini ko'rsatadi. Aynan ushbu sohalar bugungi kunda jahon iqtisodiyotining kelajagini belgilab beradi va bu sohalarda birgalikdagi sa'y-harakatlar har ikki davlatga ham katta naf keltirishi mumkin.

Samarali quruqlik va havo yo'laklarini rivojlantirish, shuningdek, to'g'ridan-to'g'ri aviaqatnovlarni yo'lga qo'yish imkoniyatlarini ko'rib chiqish masalasi nafaqat ikki tomonlama munosabatlar, balki butun mintaqa uchun muhim ahamiyatga ega. O'zbekiston Markaziy Osiyodagi asosiy davlat sifatida, Bolgariya esa YI a'zosi sifatida yangi logistika yo'nalishlarini yaratishda muhim rol o'ynashi mumkin. Bu qit'alar o'rtasidagi savdo-sotiqni faollashtirishga xizmat qilishi shubhasiz.

Ikki tomonlama hamkorlikni kengaytirish to'g'risidagi qo'shma deklaratsiyaning imzolanishi va boshqa ikki tomonlama hujjatlarning almashinuvi ikki tomonning niyatlari qanchalik jiddiy ekanini ko'rsatadi.

Men, shuningdek, qo'shma "yo'l xaritasi" orqali kelishuvlarning bajarilishi ustidan tizimli nazorat o'rnatish va Hukumatlararo komissiya hamraislari mavqeini oshirish istagini ham qayd etgan bo'lardim.

Umuman olganda, Bolgariya Prezidentining O'zbekistonga tashrifi strategik sheriklikni chuqurlashtirish yo'lidagi salmoqli qadamdir.