BOKU, 10-iyun. /"Dunyo" AA/. Ozarbayjon davlat iqtisodiyot universiteti dotsenti Emin Garibli "Dunyo AA" uchun intervyusida IV Toshkent xalqaro investitsiya forumi hamda Slovakiya Bosh vaziri Robert Fitso va Bolgariya Prezidenti Rumen Radevning O'zbekistonga buyurgan tashriflari haqidagi fikrlarini bildirdi:

– 2025-yilning 10-12-iyun kunlari O'zbekiston poytaxtida bo'lib o'tayotgan IV Toshkent xalqaro investitsiya forumi nafaqat Markaziy Osiyo uchun asosiy iqtisodiy platforma, balki Yevropa va Osiyo o'rtasidagi integratsiya jarayonlarini chuqurlashtirishning muhim vositasiga aylanib bormoqda. Forum Toshkentning investitsiyalarni jalb etishning mintaqaviy markazi maqomini mustahkamlaydi va mamlakatimizning Yangi O'zbekiston strategiyasi doirasidagi islohotlarni ilgari surish qat'iyatini namoyish etadi.

Tadbirning asosiy mavzulari raqamli transformatsiya, barqaror rivojlanish, infratuzilma loyihalari va mamlakatning zamonaviy, inklyuziv va raqobatbardosh iqtisodiyotni barpo etish istagini aks ettiruvchi strategik islohotlar bo'ladi. Amalga oshirilayotgan islohotlar, qonunchilikning shaffofligini ta'minlash va investorlar uchun samarali kafolatlar xalqaro ishbilarmonlar hamjamiyatiga ishonchni mustahkamlashga xizmat qilmoqda va chet el kapitalining kirib kelishini rag'batlantirmoqda.

Forumga Yevropa davlatlarining yuqori martabali vakillari, jumladan, Prezident Shavkat Mirziyoyevning taklifiga binoan Toshkentga tashrif buyurgan Slovakiya Bosh vaziri Robert Fitso va Bolgariya Prezidenti Rumen Radev ishtirok etayotgani qo'shimcha ahamiyat kasb etmoqda.

Ushbu tashriflar nafaqat O'zbekistonning tashqi iqtisodiy hamkorlik sohasidagi strategik intilishlarini ta'kidlabgina qolmay, balki xavfsizlik, raqamli hamkorlik va transport infratuzilmasi kabi sohalarda ham aniq kelishuvlar imzolanishiga xizmat qiladi.

Bolgariyaning "Birdamlik halqasi" va qayta tiklanadigan energiyani Yevropaga o'tkazish bo'yicha "yashil kabel" loyihasi kabi mintaqaviy tashabbuslarda ishtirok etishi, bunda Ozarbayjon ham, O'zbekiston ham ishtirok etayotgani shundan dalolat beradi. Bu loyihalar Kaspiydan YEIgacha bo'lgan barqaror va o'zaro bog'liq energetika infratuzilmasini shakllantirishning real istiqbollarini ochib beradi, ishtirokchi davlatlarning kelajakdagi "yashil" iqtisodiyot uchun ishonchli yetkazib beruvchilar va logistika markazlari sifatidagi mavqeini mustahkamlaydi.

Forum doirasida ham ikki tomonlama, ham Turkiy davlatlar tashkiloti doirasida faol hamkorlik qilib kelayotgan Ozarbayjon va O'zbekistonning o'zaro aloqalari alohida strategik ahamiyatga ega. Ozarbayjon transport, energetika, raqamli iqtisodiyot va qishloq xo'jaligi sohalarida o'zini asosiy hamkor sifatida ko'rsatdi. Uning xalqaro koridorlarda, jumladan, O'rta yo'lakda ishtirok etishi Bokuni qit'alararo hamkorlikning rivojlanayotgan arxitekturasining strategik bo'g'iniga aylantiradi.

Ozarbayjon va O'zbekistonning infratuzilma va "yashil" loyihalarni amalga oshirishdagi birgalikdagi sa'y-harakatlari, raqamli tashabbuslarni qo'llab-quvvatlash va barqaror rivojlanish yo'lidagi hamkorlik texnologik modernizatsiya hamda Yevropa va Osiyo bozorlariga integratsiyalashuv uchun yangi ufqlarni ochmoqda. Bu jarayonlar har ikki davlatning ham siyosiy irodasi, ham sarmoyaviy salohiyati bilan qo'llab-quvvatlanib, ularning mintaqada barqaror o'sish omili sifatidagi rolini kuchaytirmoqda.

Shunday qilib, IV Toshkent xalqaro investitsiya forumi nafaqat O'zbekistonning sarmoyaviy salohiyatini namoyish etish maydoni, balki Yevropa va Osiyo o'rtasida umumiy manfaatlarni ilgari surish, strategik sheriklik munosabatlarini kengaytirish va yagona hamkorlik makonini shakllantirishda turkiy davlatlarning sa'y-harakatlarini birlashtirish nuqtasi sifatida ham faoliyat ko'rsatmoqda.